মণিপুৰৰ বীৰেন সিং নেতৃত্বাধীন বিজেপি মিত্ৰজোঁট চৰকাৰৰ পৰা সমৰ্থন প্ৰত্যাহাৰ কৰিছে কুকি পিপলছ এলায়েন্সে (কে পি এ)। বীৰেন সিং চৰকাৰৰ পৰা সমৰ্থন প্ৰত্যাহাৰ কৰাৰ কথা উল্লেখ কৰি কেপিএ-ই মণিপুৰৰ ৰাজ্যপাল অনুসূয়া উইকেৰ হাতত পত্ৰ দাখিল কৰিছে।
কেপিএ-ই মণিপুৰৰ ৰাজ্যপাললৈ লিখা পত্ৰত উল্লেখ কৰিছে যে, ‘বৰ্তমানৰ হিংসাত্মক পৰিস্থিতিৰ বিষয়ে সযতনে বিবেচনা কৰাৰ পিছত মুখ্যমন্ত্ৰী এন বীৰেণ সিঙৰ নেতৃত্বত মণিপুৰৰ বৰ্তমানৰ চৰকাৰখনৰ প্ৰতি অব্যাহত থকা সমৰ্থন আৰু এতিয়া ফলপ্ৰসূ নহয়।‘
ইয়াত লগতে কোৱা হৈছে, “সেই অনুসৰি ইয়াৰ দ্বাৰা মণিপুৰ চৰকাৰৰ পৰা কেপিএ-ৰ সমৰ্থন প্ৰত্যাহাৰ কৰা হৈছে আৰু ইয়াক বাতিল বুলি গণ্য কৰিব পাৰি।”
উল্লেখ্য যে মণিপুৰ বিধানসভাত কেপিএ-ৰ দুগৰাকী বিধায়ক আছে।
কেপিএ-ৰ বিধায়ক দুগৰাকী হ’ল: চাইকুলৰ পৰা কিমনেও হাওকিপ হাংছিং আৰু সিংহাটৰ পৰা চিনলুনথাং।
মণিপুৰৰ বিজেপি নেতৃত্বাধীন চৰকাৰৰ পৰা কেপিএ-ই সমৰ্থন প্ৰত্যাহাৰ কৰাৰ পিছত বিভিন্ন ৰাজনৈতিক দলৰ মুঠ ৫৩ গৰাকী বিধায়ক আৰু নিৰ্দলীয় বিধায়কৰ চৰকাৰৰ প্ৰতি সমৰ্থন থাকিব।
বিজেপি নেতৃত্বাধীন মণিপুৰ চৰকাৰৰ পৰা কেপিএ-ই সমৰ্থন প্ৰত্যাহাৰ কৰাৰ পিছতে কেইবাটাও কুকি নাগৰিক সমাজ সংগঠনে কুকি বিধায়কক মণিপুৰ বিধায়িনী সভাৰ বিশেষ অধিৱেশনত উপস্থিত নাথাকিবলৈ আহ্বান জনাইছে।
প্ৰসংগক্ৰমে, অঞ্চলটোৰ শীৰ্ষ কুকি সংগঠন কুকি ইনপি মণিপুৰে (KIM) শেহতীয়াকৈ কেইবাটাও কুকি গোটৰ হৈ সদৰী কৰিছিল যে মণিপুৰ বিধানসভাৰ আগন্তুক অধিৱেশনত “সমগ্ৰ সম্প্ৰদায়ৰ স্বাৰ্থত” কোনো কুকি-জো বিধায়কে ব্যক্তিগতভাৱে হওক বা ভিডিঅ’ কনফাৰেন্সিং মাধ্যমেৰে হওক অংশগ্ৰহণ কৰিব নালাগে।
উল্লেখ্য যে যোৱা ৩ মে’ৰ পৰা ৰাজ্যত সংঘটিত হোৱা জনগোষ্ঠীয় সংঘৰ্ষ আৰু বৃহৎ হিংসাত্মক ঘটনাত মণিপুৰ উত্তপ্ত হৈ আছে।
মণিপুৰত সংঘটিত হিংসাত্মক পৰিস্থিতিত ১৫০ জনৰো অধিক লোকে প্ৰাণ হেৰুৱাইছে আৰু হাজাৰ হাজাৰ লোক গৃহহীন হৈ পৰিছে।
