অহা ২২ জুনত লখিমপুৰ জিলাৰ ঢকুৱাখনাত অনুষ্ঠিত হ’ব তৃতীয় সংখ্যক থলুৱা আম মহোৎসৱ। এই কথা জানিবলৈ দিছে অনুষ্ঠানটোৰ আয়োজক জিতুল শইকীয়াই।
আমৰ থলুৱা প্ৰজাতিৰ বিভিন্ন প্ৰকাৰৰ আমৰ সংৰক্ষণ আৰু প্ৰমোশ্যনৰ বাবে আয়োজন কৰা এই ব্যতিক্ৰমী মহোৎসৱটো এই বছৰ অনুষ্ঠিত হ’ব জিলাখনৰ ঢকুৱাখনাৰ নৰ্মাল স্কুলত।
এই মহোৎসৱটো যৌথভাৱে আয়োজন কৰিছে ঢকুৱাখনা মহকুমা কৰ্তৃপক্ষ, ঢকুৱাখনা ৰাষ্ট্ৰীয় গ্ৰামীণ জীৱিকা অভিযান আৰু ঘিলামৰা গ্ৰাম্য উন্নয়ন খণ্ডই। ইয়াত কাৰিকৰীভাৱে সহযোগ কৰিছে নৰ্থইষ্ট ৱাইল্ড ছিল্ক ছচাইটি আৰু উত্তৰ লখিমপুৰৰ অসম কৃষি বিশ্ববিদ্যালয়ৰ আঞ্চলিক কৃষি গৱেষণা কেন্দ্ৰই।
মহোৎসৱৰ লগত সংগতি ৰাখি থলুৱা জাতৰ আমৰ সংৰক্ষণ, প্ৰমোশ্যন আৰু বাণিজ্যিকীকৰণৰ বিষয়ে এখন আলোচনা চক্ৰৰো আয়োজন কৰা হৈছে।
গুৱাহাটীৰ আই এ এছ এছ টিৰ সঞ্চালক ড০ নাৰায়ন চন্দ্ৰ তালুকদাৰ, ড০ ৰাজেন্দ্ৰ প্ৰসাদ দাস আৰু যোৰহাটৰ অসম কৃষি বিশ্ববিদ্যালয়ৰ অধ্যাপকে আলোচনা চক্ৰখনিত সমল ব্যক্তি হিচাপে উপস্থিত থাকিব।
লখিমপুৰৰ উপায়ুক্ত ড০ জীৱন বি মহোৎসৱত মুখ্য অতিথি হিচাপে উপস্থিত থাকিব। স্থানীয় খেতিয়ক আৰু ছাত্ৰৰ মাজত ভাৱ বিনিময়ৰ অনুষ্ঠান এটিৰো আয়োজন কৰা হৈছে। জিতুল শইকীয়াই জানিবলৈ দিয়া মতে, মহোৎসৱত পঞ্চাশ বিধতকৈয়ো অধিক থলুৱা জাতৰ আমৰ প্ৰদৰ্শনী তথা বিক্ৰী মুকলি থাকিব।
উল্লেখযোগ্য যে নৰ্থইষ্ট ৱাইল্ড ছিল্ক ছচাইটিয়ে গোটেই উত্তৰ-পূৰ্বাঞ্চলৰ ভিতৰতে প্ৰথমবাৰৰ বাবে ২০১৭ চনত উত্তৰ লখিমপুৰত আৰু দ্বিতীয়বাৰৰ বাবে যোৱা বছৰ ধেমাজিৰ মাছখোৱাত থলুৱা আম মহোৎসৱৰ আয়োজন কৰিছিল।
