ছিমলা-কালকা হেৰিটেজ ৰে’ল পথত ভয়াৱহ ভূমিস্খলন: দুৰ্ঘটনাৰ পৰা কথমপি ৰক্ষা যাত্ৰীবাহী ৰে’লৰ
বৰষুণ আৰু ভূমিস্খলনে শেহতীয়াকৈ সমগ্ৰ দেশতে ভয়াৱহ ৰূপ ধাৰণ কৰিছে। বিশেষকৈ দেশৰ পাহাৰী এলেকা সমূহত ভূমিস্খলনৰ ফলত যোৱা কিছুদিনত কেইবাগৰাকীও লোকৰ মৃত্যু হৈছে।
দেশৰ বিভিন্ন প্ৰান্তত সৃষ্টি হোৱা এনে ভয়ানক প্ৰাকৃতিক দুৰ্যোগৰ মাজতে আজি হিমাচল প্ৰদেশৰ এক পাহাৰীয়া ৰে’ল পথত আন এক ভূমিস্খলন সংঘটিত হৈছে।
ৰাজ্যখনৰ চিমলা-কালকা হেৰিটেজ ৰে’ল পথত হোৱা এই ভয়াৱহ ভূমিস্খলনৰ ঘটনাত কথমপি দুৰ্ঘটনাগ্ৰস্ত হোৱাৰ পৰা ৰক্ষা পৰে এখন যাত্ৰীবাহী ৰে’ল।
প্ৰায় ৫০ জনতকৈও অধিক যাত্ৰী কঢ়িয়াই নিয়া ৰে’লখন চোলান জিলাৰ পাট্টা ম’ৰত উপস্থিত হোৱাৰ পাহাৰৰ ওপৰৰ পৰা শিল খহি পৰিবলৈ ধৰে।
যাত্ৰাপথতে এই আকস্মিক দুৰ্যোগৰ মুখামুখি হোৱাৰ পিছত অৱশ্যে চালকজনে সতৰ্কতাৰে লগে লগে ট্ৰেইনখন ৰখাবলৈ সক্ষম হয় আৰু এক ভয়াৱহ দুৰ্ঘটনা সংঘটিত হোৱাৰ পৰা ৰক্ষা কৰে।
খহি অহা শিলেৰে ট্ৰেকটো বন্ধ হৈ পৰাৰ বাবে বহু সময় ধৰি ৰে’ল চলাচল ব্যাহত হয়।
অৱশ্যে বিভাগীয় কৰ্তৃপক্ষই ট্ৰেকটো মুকলি কৰাৰ পিছত ৰে’ল সেৱা পুনৰ আৰম্ভ হয়।