বলীউদতো পৰিচিতি লাভ কৰা এইগৰাকী ছলনাময়ী মালায়ালম অভিনেত্ৰী হ’ল লীনা মাৰিয়া পল। প্ৰায় ২০০কোটি টকাৰ প্ৰৱঞ্চনাৰ অভিযোগত অভিযুক্ত এই ললনা।
দেওবাৰে দিল্লী আৰক্ষীৰ অৰ্থনৈতিক অপৰাধ শাখাই গ্ৰেপ্তাৰ কৰে অভিনেত্ৰীগৰাকীক। লীনাৰ বিৰুদ্ধে অভিযোগ যে তেওঁৰ কাৰাবন্দী প্ৰতাৰক প্ৰেমিক চন্দ্ৰশেখৰৰ সৈতে প্ৰৱঞ্চনাত জড়িত হৈ পৰিছে অভিনেত্ৰীগৰাকী। দিল্লী উচ্চ ন্যায়ালয়ে অভিনেত্ৰীগৰাকীক ১৫দিনৰ আৰক্ষী জিম্মালৈ প্ৰেৰণ কৰিছে।
বলীউদতো পৰিচিতি লাভ কৰা লীনাক দেখা গৈছিল ২০১৩ চনত মুক্তি পোৱা সুজিত ছিৰকাৰৰ ছবি ‘মাদ্ৰাজ কাফে’ত।
বিগত কেইবামাহো ধৰি লীনাৰ প্ৰেমিক চন্দ্ৰশেখৰ কাৰাগাৰত বন্দী হৈ আছে। চন্দ্ৰশেখৰৰ বিৰুদ্ধে ধন আত্মস্যাৎ, প্ৰতাৰণাকে ধৰি মুঠ ২১ টা অভিযোগ আছে। এই গোচৰত সাক্ষী হিচাপে আৰক্ষীৰ ওচৰত সাক্ষ্যদান কৰিছে অভিনেত্ৰী জেকলিন ফৰ্ণাণ্ডেজে।
জানিব পৰা মতে, কাৰাগাৰত বন্দী হৈ থাকিও প্ৰেমিকা লীনাৰ জৰিয়তে প্ৰৱঞ্চনাৰ জাল পেলাই গৈছিল চন্দ্ৰশেখৰে। এই দুস্কাৰ্যত লীনাৰ সৈতে জড়িত আছিল আন দুগৰাকী আৰক্ষী বিষয়া আৰু লগত আছিল চন্দ্ৰশেখৰ দুই সহযোগী।
আৰক্ষীয়ে লীনাৰ সেই দুই সহযোগী তথা এছিটেন্ট জেইল ছুপাৰিন্টেণ্ড আৰু ডেপুটি ছুপাৰিন্টেণ্ডকো গ্ৰেপ্তাৰ কৰিছে।
লীনা পলক আৰক্ষীয়ে ২০০কোটি টকা ধন আত্মস্যাৎ কৰা চক্ৰৰ সৈতে জড়িত চন্দ্ৰশেখৰৰ সৈতে সহযোগ কৰাৰ অভিযোগত গ্ৰেপ্তাৰ কৰিছে। চক্ৰটোৱে ফৰ্টিছ হেলথকেয়াৰৰ প্ৰাক্তন প্ৰম’টাৰ শিৱিন্দৰ সিঙৰ পত্নী আদিতি সিঙৰ পৰা এই ধন লোৱাৰ অভিযোগ উঠিছে।
নিৰ্বাচন আয়োগৰ বহু চৰ্চিত উৎকোচৰ গোচৰত অভিযুক্ত চন্দ্ৰশেখৰ বৰ্তমান দিল্লীৰ ৰোহিনী জেইলত বন্দী হৈ আছে।
অভিযোগ অনুসৰি, চন্দ্ৰশেখৰে এআইএডিএমকেৰ নেতা টি টি ভি দীনকৰণৰ মধ্যভোগী হিচাপে কাম কৰিছিল যিয়ে শশীকলাৰ গোটটোৰ বাবে দলৰ দুটা-পাতৰ নিৰ্বাচনী প্ৰতীকটো লাভ কৰিবলৈ নিৰ্বাচন আয়োগৰ বিষয়াক উৎকোচ দিয়াৰ চেষ্টা কৰিছিল।
ইয়াৰ পূৰ্বে চন্দ্ৰশেখৰৰ সৈতে চেন্নাই বেংকৰ পৰা ১৯ কোটি টকা প্ৰৱঞ্চনাৰে সৰকোৱাৰ অভিযোগত ২০১৩চনত প্ৰথম লীনা পল গ্ৰেপ্তাৰ হৈছিল। সেই সময়ত আৰক্ষীয়ে তেওঁলোকৰ জিম্মাৰ পৰা ৯খন বিলাসী গাড়ী আৰু ৮১টা দামী হাত ঘড়ী উদ্ধাৰ কৰিছিল।
চন্দ্ৰশেখৰে প্ৰায়েই নিজকে তামিলনাডুৰ প্ৰাক্তন মুখ্য মন্ত্ৰী এম কৰুনানিধিৰ নাতি বুলি পৰিচয় দি তামিলনাডু, কৰ্ণাটক আৰু অন্ধ্ৰপ্ৰদেশৰ কেইবাগৰাকীও ব্যক্তিৰ পৰা চৰকাৰী ঠিকা দিয়াৰ নামত ১৫কোটিতকৈয়ো অধিক টকা সৰকাইছিল। এই প্ৰেমিকযুগলে জামিন লাভ কৰিবলৈ সক্ষম হৈছিল আৰু মুম্বাইলৈ গুচি আহিছিল।
২০১৫চনত পুনৰ ১০কোটি টকাৰ কেলেংকাৰীত আন দুজন সহযোগীৰ সৈতে এই যুটীয়ে গুৰগাঁৱৰ পৰা আৰক্ষীয়ে গ্ৰেপ্তাৰ কৰিছিল।
আনহাতে, ২০১৮চনৰ ডিচেম্বৰত লীনা মাৰিয়া পল কোচিৰ তেওঁৰ বিউটি পাৰ্লাৰত হোৱা এক গুলীয়াগুলিৰ ঘটনাৰ বাবে পুনৰ বাতৰিৰ শিৰোণামালৈ আহিছিল। ২০১৯ত গ্ৰেপ্তাৰ হোৱা আণ্ডাৰৱৰ্ল্ডৰ ডন ৰৱি ছুলিয়া পূজাৰী সেই হাই প্ৰফাইল ঘটনাত জড়িত আছিল বুলি কোৱা হৈছিল।
