বলীউদৰ কিংবদন্তি অভিনেতা দিলীপ কুমাৰ পুনৰ হাস্পাতালত ভৰ্তি হৈছে। মুম্বাইৰ পি ডি হিন্দুজা হাস্পাতালত অভিনেতাগৰাকীক ভৰ্তি কৰোৱা হৈছে।
অভিনেতাগৰাকীৰ পত্নী তথা অভিনেত্ৰী ছায়েৰা বানুৱে জানিবলৈ দিয়ে যে যোৱা কিছুদিন ধৰি দিলীপ কুমাৰ শ্বাস-প্ৰশ্বাসৰ কষ্টত ভূগি আছিল।
যোৱা মে’ মাহৰ আৰম্ভণিতে দীৰ্ঘদিনৰ বাবে অভিনেতাগৰাকী হাস্পাতালত থাকিবলগীয়া হৈছিল। দিলীপ কুমাৰৰ বৰ্তমান বয়স ৯৮বছৰ। বৰ্তমান তেওঁ বাৰ্ধক্যজনিত সমস্যাৰ বাবে অসুস্থ হৈ পৰা দেখা গৈছে।
১৯২২চনৰ ১১ডিচেম্বৰত জন্মলাভ কৰা দিলীপ কুমাৰৰ প্ৰকৃত নাম ইউছুফ খান। বলীউদৰ ইতিহাসত ‘ট্ৰেজেডি কিং’ হিচাপে পৰিচিত অভিনেতাগৰাকী।
‘বোম্বে টকিজ’ৰ বেনাৰত ১৯৪৪চনত ‘জোৱাৰ ভাটা’ ছবিৰ জৰিয়তে দিলীপ কুমাৰে অভিনয় জীৱনৰ পাতনি মেলিছিল।
বলীউদৰ এটা যুগ ধৰি এখনৰ পাছত আনখন হিট ছবি উপহাৰ দিয়া দিলীপ কুমাৰ চলচ্চিত্ৰ জগতৰ এগৰাকী আদৰ্শ পুৰুষ হিচাপেও পৰিচিত।
উল্লেখ্য যে যোৱা বছৰ দিলীপ কুমাৰে তেওঁৰ দুগৰাকী কনিষ্ঠ ভাতৃ আছলাম খান আৰু এহছাছ খানক কৰ’নাত হেৰুৱাইছে।
দিলীপ কুমাৰৰ অসুস্থতাৰ বাতৰি শুনি তেওঁৰ অজস্ৰ গুণমুগ্ধই অভিনেতাগৰাকীৰ আশু আৰোগ্য কামনা কৰিছে।
