কোভিড চিকিৎসাৰ নামত মাত্ৰাধিক টকা লোৱা আৰু চূড়ান্ত হেমাহিৰ অভিযোগত ১০খন প্ৰাইভেট হস্পিতালৰ লাইচেন্স বাতিল কৰিছে তেলেংগানাৰ চৰকাৰে।
প্ৰশাসনৰ তৰফৰ পৰা জনোৱা হৈছে, ৰাজ্যখনৰ কেইবাখনো হস্পিতালে কোভিডৰ চিকিৎসাৰ বাবে অতিৰিক্ত টকা আদায় কৰিছে বুলি অভিযোগ আহিছিল।
বিষয়টো সম্পৰ্কত প্ৰায় ১১৫খনকৈ অভিযোগ পত্ৰ জমা হৈ পৰিছিল স্বাস্থ্য বিভাগত।
শনিবাৰে স্বাস্থ্য আৰু জনকল্যাণ দপ্তৰৰ পৰা ৭৯খন হস্পিতাললৈ জাননী জাৰি কৰা হয়।
তাৰপাছতে আটাইতকৈ বেছি অভিযোগত অভিযুক্ত ১০খনকৈ হস্পিতালৰ বিৰুদ্ধে কঠোৰ পদক্ষেপ গ্ৰহণ কৰা হয়।
ৰাজ্যৰ কোভিড পৰিস্থিতিৰ বাবে ৰাজ্য চৰকাৰে চিকিৎসাৰ বাবে হস্পিতালসমূহক খৰচৰ সীমা বান্ধি দিছে।
অভিযোগ অনুসৰি, চৰকাৰৰ নিৰ্দেশক বুঢ়া আঙুলি দেখুৱাই বহু হস্পিতালে ৰোগীৰ পৰিয়ালৰ পৰা যথেষ্ট টকা আদায় কৰিছে।
কেৱল সেয়ে নহয়, হস্পিতালসমূহৰ চিকিৎসাসেৱা সম্পৰ্কেও অভিযোগ উত্থাপন কৰিছে ৰোগীসকলৰ পৰিয়ালে।
