মহানগৰীৰ সোণাপুৰৰ আচাৰ্য পংকজ পাঠকক হত্যাৰ ভাবুকি দিছে কোনো দুৰ্বৃত্তই। ফোন যোগে হত্যাৰ ভাবুকি প্ৰদান কৰিছে পাঠকক।
ঘটনা সন্দৰ্ভত পংকজ পাঠকে নৰ্থ ইষ্ট নাওৰ সাংবাদিকক কয় যে যোৱা ২১ জুলাইৰ নিশা ১১:১৫ বজাত তেওঁলৈ এক অচিনাকি নম্বৰৰ পৰা ফোন আহিছিল। ফোনতে অচিনাকি মাতৰ এজন লোকে পাঠকক হত্যা কৰিম বুলি ভাবুকি দিয়াৰ লগতে অশ্লীলভাবে গালি-গালাজ কৰিছিল।
“মই কোনো লোকে মদ খাই তেনেকৈ দম দিয়া বুলি ভাবিছিলো। সেইকাৰণে ফোনটো সংযোগ বিছিন্ন কৰি থলো। কালি নিশা ১১:৫৩ বজাত পুনৰ মোলৈ একেটা নম্বৰৰ পৰা ফোন আহিছিল। প্ৰথমবাৰ ৰিচিভ কৰাত মোক পুনৰ আগৰ দৰেই হত্যাৰ ভাবুকি দিয়ে। মই ফোনটো কাটি দিছিলো আৰু তিনি চাৰিবাৰ ফোন কৰিছিল যদিও ৰিচিভ নকৰিলো। পাছত মোক মেছেজৰ জৰিয়তে পুনৰ হত্যাৰ ভাবুকি দিয়াৰ লগতে মোৰ পত্নী আৰু সন্তান দুটিক সাঙুৰি অশ্লীল শব্দ প্ৰয়োগেৰে গালি পাৰিছিল”,- আমাৰ সাংবাদিকৰ আগত এইদৰে কয় পাঠকে।
আজি পুৱাৰ ভাগত পাঠকে সোণাপুৰ থানাত এক এজাহাৰ দাখিল কৰে। অৱশ্যে আৰক্ষীৰ তদন্তৰ স্বাৰ্থত তেওঁ ফোন নম্বৰটো দিয়াৰ পৰা বিৰত থাকে।
কবিৰাজী চিকিৎসাৰ দিহা-পৰামৰ্শ প্ৰদান কৰি অহা আচাৰ্য পংকজ পাঠক ৰাজ্যখনত জনপ্ৰিয় হৈ পৰিছিল আৰু তেওঁ লিখা বনৌষধি সম্পৰ্কীয় গ্ৰন্থই বিশেষ সমাদৰ তথা জনপ্ৰিয়তা লাভ কৰিছিল।
