আগন্তুক ৩ ঘন্টাৰ ভিতৰত প্ৰবল বৃষ্টিপাত আৰু ধুমুহাই জোকাৰি যাব গুৱাহাটী। কামৰূপ গ্ৰাম্য আৰু কামৰূপ মেট্ৰৰ বহু অঞ্চলত বৃষ্টি আৰু বজ্ৰপাত পৰাৰ সম্ভাৱনা আছে। ইতিমধ্যে জৰুৰীভাবে এই সতৰ্কবাণী জাৰি কৰিছে বতৰ বিজ্ঞান বিভাগে।
আই এম ডিৰ তথ্য অনুসৰি আগন্তুক তিনি ঘণ্টাৰ ভিতৰত বিচ্ছিন্ন স্থানত বতৰ সালসলনি হোৱাৰ সম্ভাৱনা অতিশয় বেছি।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণে জনস্বাৰ্থত এই সতৰ্কবাণী প্ৰচাৰ কৰি বাসিন্দাসকলক প্ৰয়োজনীয় সাৱধানতা অৱলম্বন কৰাৰ লগতে সম্ভৱ হ’লে ঘৰৰ ভিতৰতে থাকিবলৈ আহ্বান জনাইছে।
বতৰ বিজ্ঞান বিভাগে জনসাধাৰণক মুকলি পথাৰ, গছ আৰু জলভাগৰ পৰা আঁতৰি থাকিবলৈ পৰামৰ্শ দিছে। ধুমুহাৰ সময়ত বৈদ্যুতিক সঁজুলি ব্যৱহাৰ নকৰিবলৈও পৰামৰ্শ দিছে বিভাগে। লগতে নাগৰিকসকলক প্ৰচণ্ড বিজুলী বা বৰষুণৰ সময়ত ভ্ৰমণৰ পৰা বিৰত থাকিবলৈ অনুৰোধ জনোৱা হৈছে।
