গুৱাহাটীত সুৰাপানৰ হাৰ প্ৰায় ২০ শতাংশ বৃদ্ধি পাইছে।
চৰকাৰী তথ্য অনুসৰি, চলিত বছৰৰ জানুৱাৰিৰ পৰা নৱেম্বৰলৈকে গুৱাহাটীৰ লোকে মুঠ ১.৩৬ কোটি লিটাৰ সুৰা পান কৰিছে।
ইয়াৰ ভিতৰত ৭৬.২৭ লাখ লিটাৰ আই এম এফ এল আৰু ৫৯.৬৯ লাখ লিটাৰ বীয়েৰ।
২০১৮-১৯ (এপ্ৰিল-মাৰ্চ) বৰ্ষত মহানগৰীৰ লোকে মুঠ ১.০১ কোটি লিটাৰ সুৰা পান কৰিছে। ইয়াৰ ভিতৰত ৫৯.৩৬ লাখ লিটাৰ আই এম এফ এল আৰু ৪১.৯৫ লাখ লিটাৰ বীয়েৰ।
আনহাতে, ২০১৭-১৮ (এপ্ৰিল-মাৰ্চ) বৰ্ষত মহানগৰীখনৰ লোকে মুঠ ৭৮.৩৭ লাখ লিটাৰ সুৰা পান কৰিছে। ইয়াৰ ভিতৰত ৫০.৫৩ লাখ লিটাৰ হৈছে আই এম এফ এল আৰু ২৭.৮৩ লাখ লিটাৰ বীয়েৰ।
বাতৰি অনুসৰি আবকাৰী বিভাগৰ তথ্যত গুৱাহাটীত সুৰা পানৰ হাৰ বৃদ্ধি পাইছে।
সূত্ৰই প্ৰকাশ কৰা মতে ভাৰতত তৈয়াৰী বিদেশী সুৰা (আই এম এফ এল) পানৰ হাৰ প্ৰায় ২০ শতাংশ আৰু বীয়েৰ পানৰ হাৰ প্ৰায় ৫০শতাংশ বৃদ্ধি পাইছে।
বাতৰি অনুসৰি, ২০১৮বৰ্ষৰ জানুৱাৰিৰ পৰা অক্টোবৰলৈকে গুৱাহাটীৰ লোকে ৬৮.২৭ লাখ লিটাৰ আই এম এফ এল পান কৰাৰ বিপৰীতে বীয়েৰ পান কৰিছে ৪৬.৭৪ লাখ লিটাৰ।
কোৱা হৈছে যে মহানগৰীত সুৰা পানৰ হাৰ বৃদ্ধি পোৱাৰ ফলত আবকাৰী বিভাগৰ ৰাজহ ৩১ শতাংশ বৃদ্ধি পাইছে।
সংবাদ মাধ্যমত প্ৰকাশ পোৱা তথ্য অনুসৰি ২০১৮-১৯ বৰ্ষৰ এপ্ৰিলৰ পৰা নৱেম্বৰলৈকে আবকাৰী বিভাগে ২২৬.৭৪ কোটি টকাৰ ৰাজহ সংগ্ৰহ কৰিছে। আনহাতে, ২০১৯-২০বৰ্ষৰ এপ্ৰিলৰ পৰা নৱেম্বৰলৈকে ৰাজহৰ পৰিমান ২৯৭.৬২ কোটি টকালৈ বৃদ্ধি পাইছে।
গুৱাহাটীত আবকাৰী বিভাগে ১৮৯ কোটি টকাৰ ৰাজহ সংগ্ৰহ কৰিছে।
আনহাতে, নাগৰিকত্ব সংশোধনী আইনৰ বিৰুদ্ধে চলা প্ৰতিবাদৰ সময়ছোৱাত মহানগৰীত ৱাইন শ্বপসমূহ বন্ধ থকাৰ বাবে আবকাৰী বিভাগে প্ৰায় ৫ কোটি টকাৰ ৰাজহ হেৰুৱাইছে।
