লিভাৰপুলৰ তাৰকা ষ্ট্ৰাইকাৰ মহম্মদ চালাহ কোভিড প’জিটিভ
লিভাৰপুলৰ তাৰকা ষ্ট্ৰাইকাৰ মহম্মদ চালাহৰ শৰীৰত ক’ৰ’না ভাইৰাছৰ উপস্থিতি ধৰা পৰিছে।
শুকুৰবাৰে ইজিপ্ত ফুটবল এছ’চিয়েশ্যনে এই কথা সদৰী কৰে।
বৰ্তমান সময়ত চালাহে ইজিপ্তৰ জাতীয় ফুটবল দলৰ সৈতে আফ্ৰিকান কাপৰ প্ৰস্তুতিত ব্যস্ত হৈ আছিল।
১৫ আৰু ১৭ নৱেম্বৰত চালাহে ইজিপ্তৰ হৈ খেলত অংশ লোৱাৰ কথা আছিল।
বিগত দেওবাৰত ২৮ বৰ্ষীয় লিভাৰপুলৰ তাৰকা ফুটবলাৰগৰাকীয়ে মানচেষ্টাৰ চিটিৰ বিৰুদ্ধে প্ৰিমিয়াৰ লীগৰ এখন খেলত অংশগ্ৰহণ কৰিছিল।
আনহাতে, কোভিড প’জিটিভ হোৱা চালাহ বৰ্তমান সময়ত কোৱাৰেণ্টাইনত আছে বুলি ইজিপ্ত ফুটবল এছ’চিয়েশ্যনৰ তৰফৰ পৰা উল্লেখ কৰে।
কোভিড প’জিটিভ হ’লেও মহম্মদ চালাহৰ শৰীৰত ক’ৰ’নাৰ কোনোধৰণৰ লক্ষণে দেখা দিয়া নায়।
ইয়াৰ পূৰ্বে ক্ৰিষ্টিয়ানো ৰোণাল্ডোৰ দৰে তাৰকা ফুটবলাৰ কোভিড প’জিটিভ হৈছিল।