ৱাকফ বিধেকক লৈ পুৱাই হুলস্থূল লোকসভাত : বিজেপিৰ সন্মুখত বিৰোধীৰ প্ৰত্যাহ্বান

বুধবাৰে লোকসভাত উত্থাপন হ’বলৈ গৈ আছে বিতৰ্কিত ৱাকফ সংশোধনী বিধেয়ক। বিধেয়কখনক কেন্দ্ৰ কৰি ইতিমধ্যেই ৰাজনৈতিক বিতৰ্ক তুংগত উঠিছে। চৰকাৰ আৰু বিৰোধী দুই শিবিৰেই এই বিধেয়কক লৈ যুঁজিবলৈ টঙালি বান্ধিছে।

বিৰোধীৰ মিত্ৰজোঁটে বিধেয়কখনৰ বিৰোধিতা কৰিবলৈ একত্ৰিত হোৱাৰ বিপৰীতে বিজেপিৰ সাংসদসকলে বিধেয়কখন গৃহীত কৰিবলৈ উঠি পৰি লাগিছে।

মঙলবাৰে লোকসভাৰ অধ্যক্ষ ওম বিৰলাৰ নেতৃত্বত চলি থকা ব্যৱসায়িক পৰামৰ্শদাতা সমিতিৰ বৈঠকত বিধেয়কখনক লৈ বিতৰ্ক চৰম সীমাত উপনীত হয়। বিৰোধীয়ে ১২ ঘণ্টাৰ আলোচনাৰ দাবী উত্থাপন কৰাৰ বিপৰীতে চৰকাৰে ৪ ঘণ্টাৰ আলোচনা বিচাৰে। শেষত সিদ্ধান্ত লোৱা হ’ল যে বিষয়টো সম্পৰ্কে একেৰাহে ৮ ঘণ্টা ধৰি আলোচনা চলিন।

আনহাতে, বিজেপিৰ সাংসদসকলৰ উপস্থিতি নিশ্চিত কৰিবলৈ হুইপ জাৰি কৰা হৈছে। বৃহস্পতিবাৰে ৰাজ্যসভাৰ সাংসদসকলকো উপস্থিত থাকিবলৈ নিৰ্দেশ দিয়া হৈছে। এন ডি এৰ অংশীদাৰসকলৰ ভিতৰত জনতা দল ইউনাইটেডে বিধেয়কখনক সমৰ্থন কৰিব বুলি প্ৰকাশ কৰিছে।

ৰাজনৈতিক বিশেষজ্ঞৰ মতে, আজি যদি লোকসভাত বিধেয়কখন গৃহীত হয়, তেন্তে কাইলৈ ​​ৰাজ্যসভাত এই বিধেয়কখন গ্ৰহণ কৰিব পাৰে। ৪ এপ্ৰিলত সংসদৰ বাজেট অধিৱেশন সমাপ্ত হোৱাৰ পূর্বে বিধেয়কখন গৃহীত কৰিবলৈ চেষ্টা কৰিব।ইফালে ৰাজধানী দিল্লীত নিৰাপত্তা বৃদ্ধি কৰা হৈছে। এজন জ্যেষ্ঠ আৰক্ষী বিষয়াই জনোৱা মতে, স্পৰ্শকাতৰ অঞ্চলত অতিৰিক্ত বাহিনী মোতায়েন কৰা হৈছে। ৰাজনৈতিক দৃষ্টিকোণৰ পৰা আজিৰ অধিৱেশনখন অতি গুৰুত্বপূৰ্ণ হ’বলৈ গৈ আছে। সকলোৰে দৃষ্টি এতিয়া লোকসভাৰ ওপৰত।