“মিত্ৰজোঁট (অগপ-বিপিএফ)ৰ চাৰিখন আসনৰ এখনো লাভ কৰাৰ সম্ভাৱনা নাই।” দেশৰ সাধাৰণ নিৰ্বাচনৰ ফলাফললৈ তিনিদিন থকা অৱস্থাত দেওবাৰে সংবাদমেলযোগে এই মন্তব্য ৰঞ্জিত দাসৰ।
বিপৰীতে, প্ৰতিদ্বন্দ্বিতা কৰা অসমৰ দহোখন আসনেই লাভ কৰিব বিজেপিয়ে, দলীয় এগ্জিত প’লৰ “ভিত্তিত” সভাপতি দাসৰ মত।
চাওক বিজেপিৰ সমীক্ষা (ঊৰ্ধ্বকমাৰ ভিতৰত দাসৰ মত)।
“০” কিয় মিত্ৰ অগপ?
ধুবুৰী|| অৱস্থা নাই
“ধুবুৰী সমষ্টিত ভোট প’লিং হৈছিল ১৬,৮২,৭১১টা। তাৰে, অগপৰ প্ৰাৰ্থীজনে, লাভ কৰিব ৪,৭৫,০০০টা ভোট। গতিকে এই সমষ্টিত মিত্ৰজোঁটৰ প্ৰাৰ্থীগৰাকী জিকিব পৰা অৱস্থাত একেবাৰে নাই।”
বৰপেটা|| ভৰসা এ আই ইউ দি এফ
“বৰপেটা লোকসভা সমষ্টিত ভোট প’লিং হৈছে ১৪,৫২,২১৩টা। তাৰে অগপ প্ৰাৰ্থীগৰাকীয়ে লাভ কৰিব ৫,৪৫,০০০টা ভোট। এ আই ইউ ডি এফ দলে যদি আঢ়ৈ লাখৰ তলত ভোট পাই, তেন্তে জিকাৰ সম্ভাৱনা নাই।”
কলিয়াবৰ|| এ আই ইউ দি এফ নাই, গতিকে বিজয়?
“কলিয়াবৰ লোকসভা সমষ্টিৰ মুঠ প’লিং ভোট ১৪,২১,৫০০টাৰ অগপ-বিজেপি মিত্ৰজোঁট প্ৰাৰ্থীগৰাকীয়ে লাভ কৰিব ৬,৬০,০০০টা ভোট। এ আই ইউ ডি এফ নাই, গতিকে স্বাভাৱিকতে এ আই ইউ ডি এফৰ অধিকাংশ ভোট কংগ্ৰেছে লাভ কৰিছে। মিত্ৰজোঁট জয়ী হোৱাটো খুবেই ক্ষীণ।”
বি পি এফ?
কোকৰাঝাৰ|| একেবাৰে সুযোগ নাই
“কোকৰাঝাৰ লোকসভা সমষ্টিত মুঠ ভোট প’লিং হৈছে ১৪,৬৮,১১২টা। তাৰে বিপিএফৰ প্ৰাৰ্থীগৰাকীয়ে লাভ কৰিব ৪,৭০,০০০টা ভোট। গতিকে এই সমষ্টিত জিকাৰ একেবাৰে সুযোগ নাই বুলিয়েই ধৰি লৈছো।”
১০০% সফলতা পাব বিজেপিয়ে!
কৰিমগঞ্জ|| এ আই ইউ দি এফ আছে!
“কৰিমগঞ্জত সৰ্বমুঠ ভোট গ্ৰহণ হৈছে ১০,৫৮,০৮৮টা। তাৰে বিজেপিয়ে লাভ কৰিব ৪,৯৫,০০০টা। এই সমষ্টিটোত প্ৰায় ৫০ হাজাৰ ভোটত জয়ী হোৱাৰ সম্ভাৱনা আছে বিজেপিৰ।”
শিলচৰ|| মিঠা নহ’ব মুখ সুস্মিতাৰ?
“শিলচৰ সমষ্টিত মুঠ ভোটগ্ৰহণ হৈছে ৯,৪৫,৮৩৪টা। তাৰে বিজেপিয়ে লাভ কৰিব ৪,৬৫,০০০টা। প্ৰায় ৩৮ৰ পৰা ৬০ হাজাৰ ভোটত জয়ী হোৱাৰ সম্ভাৱনা আছে উক্ত সমষ্টিত।”
স্বায়ত্তশাসিত জিলা সমষ্টি|| পাহাৰৰ পদুম
“ডিফু সমষ্টিত ৬,১৫,৯৪৪টা ভোট প’লিং হৈছিল, তাৰে বিজেপিয়ে লাভ কৰিব ৪ লাখতকৈ অধিক ভোট। গতিকে বিজেপি জয়ী হোৱাৰ অধিক সম্ভাৱনা আছে।”
গুৱাহাটী|| ৰাণী– কুইন
“গুৱাহাটী লোকসভা সমষ্টিত মুঠ ১৭৬০৫১১টা ভোট প’লিং হৈছে। তাৰে বিজেপিৰ প্ৰাৰ্থী কুইন ওজাই লাভ কৰিব ১০১৫০০০টা ভোট লাভ কৰিব, অৰ্থাৎ নিশ্চিত জয় হ’ব ওজাৰ।”
মঙলদৈ|| আনে জিকাব বিজেপিক
“মঙ্গলদৈ লোকসভা সমষ্টিত ভোট প’লিং হৈছে ১৫,০০,৯০৮ টা। তাৰে বিজেপিয়ে লাভ কৰিব ৭,৬৫,০০০টা। কংগ্ৰেছৰ উপৰিও অন্য দলৰ প্ৰাৰ্থী থকা হেতুকে এই সমষ্টিত বিজেপি জয়ী হোৱাটো নিশ্চিত। বিজেপিয়ে যিহেতু ৫০ শতাংশৰ ওপৰত ভোট লাভ কৰিব, সেয়েহে ৫০ৰ পৰা ১ লাখ ভোটত জয়ী হোৱাটো নিশ্চিত।”
তেজপুৰ|| ভানুৰ ভাল নহ’ব
“তেজপুৰ লোকসভা সমষ্টিত মুঠ ১১,৮৩,০৩৩টা ভোট প’লিং হৈছে। ইয়াৰ ভিতৰত বিজেপিয়ে লাভ কৰিব ৬৭০০০০টা ভোট। গতিকে ইয়াতো বিজেপি জয়ী হোৱাটো নিশ্চিত।”
নগাওঁ|| গোহাঁই নাথাকিলেও থাকিব বিজেপি
“নগাওঁ লোকসভা সমষ্টিত মুঠ প’লিং ভোটৰ সংখ্যা ১৪,৮৯,৫৪৩টা। ইয়াৰে বিজেপিয়ে লাভ কৰিব ৭,৭০,০০০টা। বিজেপি প্ৰাৰ্থী জয়ী হোৱাটো নিশ্চিত।”
যোৰহাট|| জোৰহীন হাত?
“প’লিং হৈছিল ১০,৫৪,১২৫টা। ইয়াৰে বিজেপিয়ে লাভ কৰিব ৫,৮৫,০০০টা। অনায়াসে জয়লাভ কৰিম।”
ডিব্ৰুগড়|| ঘাটিত ঘাটোৱাৰ?
“ডিব্ৰুগড় লোকসভা সমষ্টিত ১০,১৩,৮২১টা ভোট প’লিং হৈছিল আৰু ইয়াৰে আমি ৬,৩০,৫০০টা ভোট লাভ কৰিম। নিশ্চিত ৰূপত ভাৰতীয় জনতা পাৰ্টিৰ প্ৰাৰ্থীয়ে ইয়াত জয়লাভ কৰিব।”
লখিমপুৰ|| প্ৰদান পুনৰাগমন!
“লখিমপুৰ লোকসভা সমষ্টিত ১২,৭৯,১১৯টা ভোট প’লিং হৈছিল আৰু ইয়াৰে ৭,৬০,০০০টা ভোট লাভ কৰিব বিজেপিয়ে। নিশ্চিত ৰূপত আমি তাত জয়লাভ কৰিম।”
দাসৰ মতে সমগ্ৰ অসমৰ বুথ পৰ্য্যায়ৰ বিজেপি কাৰ্য্যকৰ্তাই পঠিওৱা তথ্যৰ ভিত্তিত প্ৰস্তুত কৰা হৈছে এই এগ্জিত প’ল।
গেৰুৱা দলৰ এই মেগা মাইক্ৰ’ এগজিত প’ল ফলিয়াবনে?
২৩ মে’লৈ অপেক্ষাৰ বিনে গতি নাই আৰ।
