সোণোৱালৰ বিৰুদ্ধে নিৰ্বাচন আয়োগৰ কাষ চাপিব কংগ্ৰেছ, ঘোষণা তৰুণ গগৈৰ
অসমৰ মুখ্য মন্ত্ৰী সৰ্বানন্দ সোণোৱালৰ বিৰুদ্ধে নিৰ্বাচন আয়োগৰ কাষ চাপিব কংগ্ৰেছ।
গুৱাহাটীত শনিবাৰে এক সংবাদমেলযোগে এই কথা প্ৰকাশ কৰিছে প্ৰাক্তন মুখ্য মন্ত্ৰী তৰুণ গগৈয়ে।
বিজেপি মিত্ৰজোঁটক ভোট দিবলৈ সোণোৱালে শেহতীয়াকৈ কেইবাখনো সভাত ভোটাৰক “আল্লা”ৰ নামত ৰাজহুৱা শপত খুওৱাক লৈ নিৰ্বাচন আয়োগৰ কাষ চাপিব কংগ্ৰেছ।
ইতিমধ্যে বিতৰ্কৰ সৃষ্টি কৰা সোণোৱালৰ এই “শপত”এ এটা নিৰ্দিষ্ট সম্প্ৰদায়ক ভীতিগ্ৰস্ত কৰা বুলি মন্তব্য কৰিছে প্ৰাক্তন মুখ্য মন্ত্ৰীগৰাকীয়ে।
নগাঁৱৰ বিজেপি প্ৰাৰ্থী ৰূপক শৰ্মাৰ হৈ ধৰ্মীয় সংখ্যালঘু অধ্যুষিত লাহৰীঘাটত ৰাইজক “আল্লাৰ নামত” শপত খুওৱাৰ পিছত শেহতীয়াকৈ ধুবুৰীৰ হাটশিঙিমাৰীতো সোণোৱালে একেই পথ লৈছিল।
“আজিৰ তাৰিখত আপোনালোকে এটা প্ৰতিজ্ঞা দিব লাগিব। ইনশ্বা আল্লাৰ নামত প্ৰতিজ্ঞা দিব লাগিব যে আপোনালোকে এই সমষ্টিৰ মুঠ ১লাখ ৭০হাজাৰ ভোটৰ ভিতৰত ন্যূনতম ডেৰ লাখ ভোট বিজেপিৰ প্ৰাৰ্থী ৰূপক শৰ্মাক দিব।”, নিৰ্বাচনী সভাত এই আহ্বান জনাইছিল সোণোৱালে।