গুৱাহাটীত পত্নীসহ ভোট দিব প্ৰাক্তন প্ৰধান মন্ত্ৰী মনমোহন সিঙে
অহা ২৩ এপ্ৰিলত দেশৰ প্ৰাক্তন প্ৰধান মন্ত্ৰী মনমোহন সিং আৰু পত্নী গুৰচৰণ কৌৰে গুৱাহাটীত কৰিব লোকসভা নিৰ্বাচনৰ ভোটদান।
প্ৰদেশ কংগ্ৰেছৰ এজন জ্যেষ্ঠ মুখপাত্ৰই এই কথা সদৰী কৰি কয় যে ভোটদানৰ পিছতে সেইদিনাই পুনৰ নতুন দিল্লীলৈ উৰা মাৰিব প্ৰাক্তন প্ৰধান মন্ত্ৰীজনে।
সিং আৰু পত্নী কৌৰ দিচপুৰ বিধানসভা সমষ্টিৰ ভোটাৰ।
অসমৰ ৫২নং বিধানসভা সমষ্টিটোৰ ভোটাৰ তালিকাৰ ৬২৩ ক্ৰমাংকত সিঙৰ নাম আছে। কৌৰৰ ভোটাৰ নং ৬২৪।
সিঙৰ আৱাসৰ ঠিকনাৰূপে উল্লেখ আছে ঘৰ নং ৩৯৮৯, সৰুমটৰীয়া, গুৱাহাটী। অসমৰ প্ৰাক্তন মুখ্য মন্ত্ৰী হিতেশ্বৰ শইকীয়াই তেওঁৰ ঘৰটো সিঙক ভাৰাত ব্যৱহাৰ কৰিবলৈ দিছিল।
নৰসিমহা ৰাও চৰকাৰত কেন্দ্ৰীয় বিত্ত মন্ত্ৰীৰূপে মনমোহন সিং অন্তৰ্ভুক্ত হোৱাৰ পিছত তদানীন্তন মুখ্য মন্ত্ৰী শইকীয়াই তেওঁলৈ অসমৰ ৰাজ্যসভাৰ আসন এখন আগবঢ়াইছিল।
১৯৯১ চনৰে পৰা ধাৰাবাহিকভাৱে ৫ বাৰৰ বাবে প্ৰাক্তন প্ৰধান মন্ত্ৰীগৰাকীয়ে ৰাজ্যসভাত অসমক প্ৰতিনিধিত্ব কৰি আহিছে।
এই বছৰৰ জুনত তেওঁৰ ৰাজ্যসভাৰ সভ্য পদ উকলিব।