ভাৰত বিৰোধী মন্তব্য প্ৰকাশেৰে বিখ্যাত হৈ পৰা নেপালৰ প্ৰধান মন্ত্ৰী কে পি শৰ্মা অলিৰ সোমবাৰে দিয়া বিতৰ্কিত মন্তব্যই ভাৰতত যথেষ্ট চৰ্চা লাভ কৰিছে।
নেপালৰ প্ৰধান মন্ত্ৰী অ’লিয়ে সোমবাৰে প্ৰকৃত অযোধ্যা ভাৰতত নহয় নেপালতহে অৱস্থিত বুলি মন্তব্য কৰে।
”ভগৱান ৰাম এজন নেপালী ভাৰতীয় নহয়,” কে পি শৰ্মা অ’লিয়ে কয়।
অ’লিয়ে কোৱা মতে, ভগৱান ৰামৰ জন্মস্থান অযোধ্যা উত্তৰপ্ৰদেশত নহয় দক্ষিণ নেপালৰ থোৰিৰ বাল্মীকি আশ্ৰমৰ ওচৰতহে।
নেপালী কবি ভানুভক্তৰ জন্মজয়ন্তী উপলক্ষ্যে নেপালৰ প্ৰধান মন্ত্ৰীৰ বাসভৱনত অনুষ্ঠিত এক অনুষ্ঠানত অংশ লৈ প্ৰধান মন্ত্ৰী অ’লিয়ে এইদৰে বিতৰ্কিত মন্তব্য কৰে।
ভাষণ প্ৰসংগত অ’লিয়ে নেপাল সাংস্কৃতিক আগ্ৰাসনৰ বলি হোৱা বুলি উল্লেখ কৰি নেপালৰ ইতিহাসক বিকৃত কৰা হৈছে বুলিও লগতে কয়।
নেপালী কবি ভানুভক্তই পশ্চিম নেপালৰ থানুত ১৮১৪ চনত জন্মগ্ৰহণ কৰিছিল। ভানুভক্ত বাল্মিকীৰ ৰামায়ণ নেপালী ভাষালৈ অনুবাদ কৰাৰ বাবে বিখ্যাত হৈ পৰিছিল।
১৮৬৮ চনত ভানুভক্তৰ দেহাৱসান ঘটিছিল।
”যদিও প্ৰকৃত অযোধ্যা নেপালৰ পশ্চিম বীৰগুঞ্জৰ থোৰিত অৱস্থিত, ভাৰতে ৰামৰ জন্মস্থান তেওঁলোকৰ দেশতহে বুলি দাবী কৰি আহিছে,” নেপালৰ প্ৰধান মন্ত্ৰীয়ে লগতে কয়।
”আমি বিশ্বাস কৰো যে সীতা ভাৰতৰ ৰাজকুমাৰ ৰামৰ সৈতে বিবাহপাশত আৱদ্ধ হৈছিল। প্ৰকৃততে অযোধ্যা এখন পশ্চিম বীৰগুঞ্জত অৱস্থিত এখন গাঁওহে,” বিতৰ্কিত অ’লিৰ বিতৰ্কিত মন্তব্য।
আনহাতে, প্ৰধান মন্ত্ৰী গৰাকীয়ে সেই সময়ত দুৰ্গম যোগাযোগ ব্যৱস্থা আৰু পৰিবহন ব্যৱস্থাৰ অভাৱৰ বাবে ইমান দূৰত দৰা-কইনাৰ বিবাহ সম্ভৱ হ’বই নোৱাৰে বুলিও দাবী কৰে।
