অসমৰ বক্সাৰ লাভলিনা বৰগোহাঁয়ে আজি অনুষ্ঠিত এখন খেলত সতীৰ্থ বক্সাৰ ললিতাক পৰাজিত কৰি অলিম্পিকৰ যোগ্যতা নিৰ্ণায়ক প্ৰতিযোগিতাত ভাগ লোৱাটো নিশ্চিত কৰিছে।
ফেব্ৰুৱাৰিৰ প্ৰথম ভাগতে চীনৰ য়ুহানত এই অলিম্পিক কোৱালিফায়াৰ খেলবোৰ অনুষ্ঠিত হ’ব। তাৰ বাবে ভাৰতীয় দলটোৰ নিৰ্বাচন চলি আছে।
৬৯ কেজি শাখাত খেলা লাভলিনাই আজি ললিতাক পৰাজিত কৰাৰ পূৰ্বে ২৭ ডিচেম্বৰত আন এগৰাকী সতীৰ্থ অঞ্জলিক ১০-০ ব্যৱধানত পৰাজিত কৰিছিল।
অসমৰ উদীয়মান বক্সাৰ, গোলাঘাট জিলাৰ জীয়াৰী লাভলিনাই ইতিপূৰ্বে বিশ্ব চেম্পিয়নশ্বিপত দুটাকৈ ব্ৰঞ্জৰ পদক আৰু এছিয়ান চেম্পিয়নশ্বিপত এটা ব্ৰঞ্জৰ পদক অৰ্জন কৰিছে। যোৱা আগষ্টত ৰাছিয়াত অনুষ্ঠিত এখন আন্তঃৰাষ্ট্ৰীয় প্ৰতিযোগিতাত স্বৰ্ণ পদক জয় কৰিছিল।
ইপিনে আজি পুৱাৰ ভাগত হোৱা এখন খেলত মণিপুৰৰ বিশ্বখ্যাত বক্সাৰ মেৰী কমে কনিষ্ঠ সতীৰ্থ নিখাত জেৰিনক পৰাস্ত কৰি এই অলিম্পিক যোগ্যতা নিৰ্ণায়ক প্ৰতিযোগিতালৈ নিৰ্বাচিত হৈছিল।
পূৰ্বে ৰিঙত মুখামুখি হ’বলৈ মেৰী কমক মুকলি প্ৰত্যাহ্বান জনোৱা জেৰিনক ৬বাৰৰ বিশ্ব চেম্পিয়নগৰাকীয়ে ৯-১ ব্যৱধানত পৰাস্ত কৰি তেওঁৰ ধাৰণা ভুল প্ৰমাণিত কৰে।