মাদক দ্ৰব্য সেৱনৰ বিৰুদ্ধে সজাগতা অনাৰ প্ৰয়াস হোজাইৰ এখন প্ৰাথমিক বিদ্যালয়ৰ
মাদক দ্ৰব্যৰ ব্যৱহাৰে সমাজৰ নৱপ্ৰজন্মক কিদৰে ধ্বংসৰ গৰাহলৈ ঠেলি দিছে সেই বিষয়ে অৱগত কৰোৱা আৰু ইয়াৰ বিৰুদ্ধে সজাগতা সৃষ্টি কৰাৰ উদ্দেশ্যেৰে হোজাই জিলাৰ লংকাৰ অন্তৰ্গত ১১৩৫ নং চুটালিখা নিম্ন প্ৰাথমিক বিদ্যালয়ৰ ছাত্ৰী-ছাত্ৰীসকলৰ উপস্থিতিত আজি এখন সজাগতা সভা অনুষ্ঠিত হয়।
সজাগতামূলক সভাত বিদ্যালয়খনৰ প্ৰধান শিক্ষক জিতেন্দ্ৰ চৌহানে ভাষণত সকলো ছাত্ৰ-ছাত্ৰীকে মাদক দ্ৰব্য সেৱনৰ বেয়া অভ্যাস নলবলৈ আহ্বান জনায়। তেওঁ লগতে কয়, ‘এখন দেশৰ প্ৰগতি তেতিয়াহে হ’ব যেতিয়া দেশখন বেমাৰৰ পৰা মুক্ত হ’ব’।
‘মাদক দ্ৰব্য সেৱনে স্বাস্থ্যৰ যথেষ্ট অৱনতি ঘটোৱায়। আৰু আমি মাদক দ্ৰব্য সেৱন বন্ধ কৰিবলৈ বিভিন্ন পদক্ষেপ গ্ৰহণ কৰিব লাগিব’। এইদৰেও কোৱা দেখা যায় নিম্ন প্ৰাথমিক বিদ্যাৱলয়খনৰ প্ৰধান শিক্ষকজনক।
বিদ্যালয়খনৰ প্ৰধান শিক্ষক জিতেন্দ্ৰ চৌহানে সংবাদ মাধ্যমৰ সৈতে হোৱা সাক্ষাতৰ সময়ত কয় যে ছাত্ৰ-ছাত্ৰীসকলৰ সৈতে একত্ৰিত হৈছো কিয়নো তেওঁলোকক মাদক দ্ৰব্যৰ ভয়াবহতাৰ বিষয়ে অৱগত কৰোৱা। সৰুৰে পৰা যদি ইয়াৰ ভয়াবহতা জানে তেন্তে তেওঁলোকে ভৱিষ্যতে ইয়াৰ বিৰুদ্ধাচৰণ কৰিব পৰাৰ লগতে এখন সুস্থ সবল সমাজ গঢ়াত মনোনিৱেশ কৰিব পাৰিব।
‘আমি সাধাৰণতে পঢ়া শুনাৰ উপৰি ছাত্ৰ-ছাত্ৰীসকলৰ সুন্দৰ ভৱিষ্যতৰ বাবে এনেধৰণৰ সজাগতা সভাৰ লগতে বিভিন্ন খেল ধেমালীও অনুষ্ঠিত কৰি আহিছো’। এইবুলিও কয় প্ৰধান শিক্ষক জীতেন্দ্ৰ চৌহানে।
উল্লেখ্য যে আজি অনুষ্ঠিত কৰা সজাগতা সভাখনত বিদ্যালয়খনৰ প্ৰায় ৩০ জন ছাত্ৰ-ছাত্ৰীয়ে অংশ লোৱা বুলি বিদ্যালয় কৰ্তৃপক্ষই জানিবলৈ দিয়ে।