আকাশবাণী ডিব্ৰুগড়ৰ সোণালী জয়ন্তীৰ শুভাৰম্ভ

বিশিষ্ট সাহিত্যিক ড০ নগেন শইকীয়াই কয় যে আকাশবাণী ডিব্ৰুগড়ে ১৯৬৯ চনৰ ফেব্ৰুৱাৰীত ইয়াৰ স্থাপনা কালৰে পৰা অসম আৰু অৰুণাচল প্ৰদেশৰ নাগৰিকসকলৰ মাজত বুজাবুজি আৰু ভাতৃত্ববোধৰ এক পৰিৱেশ সৃষ্টি কৰি আহিছে।

শুকুৰবাৰে সন্ধিয়া ডিব্ৰুগড় আকাশবাণী কেন্দ্ৰৰ চৌহদত আকাশবাণীৰ সোণালী জয়ন্তীৰ বৰ্ষজোৰা কাৰ্যসূচীৰ শুভাৰম্ভ কৰি ড০ শইকীয়াই এইদৰে কয়।

চমু অথচ সাৰগৰ্ভ ভাষণত তেওঁ আশা ব্যক্ত কৰে যে অনাগত ভৱিষ্যততো কেন্দ্ৰটোৱে সমাজলৈ ইয়াৰ সেৱা আগবঢ়াই যাব।

ইয়াৰ পূৰ্বে আকাশ বাণী ডিব্ৰুগড়ৰ বৰ্ষজোৰা সোণালী জয়ন্তী উদযাপন ৰাতিপুৱা বিভিন্ন কাৰ্যসূচী আৰু সাংস্কৃতিক অনুষ্ঠানেৰে আৰম্ভ কৰা হয়।

ৰাতিপুৱা ৫-৩০ বজাত পুৰণি হাইস্কুল খেলপথাৰৰ পৰা আকাশবাণী ডিব্ৰুগড় কেন্দ্ৰ চৌহদলৈ প্ৰায় ৬ কিলোমিটাৰ দূৰত্ব সামৰি এক ‘’শান্তিৰ বাবে দৌৰ’’ কাৰ্যসূচীৰ আয়োজন কৰা হৈছিল।

এই দৌৰ কাৰ্যসূচী মুকলি কৰে চিআৰপিএফৰ ১৭১ বেটেলিয়নৰ কমাণ্ডেন্ট প্ৰদ্যুন্ম কুমাৰ, আকাশবাণীৰ উত্তৰ-পূৰ্বাঞ্চলৰ উপ সঞ্চালক ৰাজীৱ বৰুৱা, ডিব্ৰুগড় কেন্দ্ৰৰ কাৰ্যালয় মুৰব্বী এ কে মিশ্ৰ আৰু আকাশবাণী ডিব্ৰুগড় কেন্দ্ৰৰ কাৰ্যসূচী মুৰব্বী লোহিত ডেকাই।

এই শান্তিৰ দৌৰত আকাশবাণী ডিব্ৰুগড় কেন্দ্ৰৰ বিষয়াসকলৰ লগতে অংশগ্ৰহণ কৰে গুড মৰ্নিং ইণ্ডিয়া ক্লাৱৰ সদস্যসকল, ডিএইচ এছ কে কানৈ কলেজৰ শিক্ষক আৰু ছাত্ৰসকল, ডিব্ৰুগড় চৰকাৰী ল’ৰা উচ্চতৰ মাধ্যমিকৰ ছাত্ৰসকল গ্ৰাহাম বজাৰ ছোৱালী হাইস্কুলৰ ছাত্ৰীসকল, গ্ৰাহাম বজাৰ ল’ৰা হাইস্কুলৰ ছাত্ৰসকলৰ লগতে পাব্লিক হাইস্কুলৰ ছাত্ৰ-ছাত্ৰীসকলে।

দৌৰত অংশগ্ৰহণ কৰাৰ বাবে  ডিব্ৰুগড়ৰ পাব্লিক স্কুলৰ বিশেষভাৱে সক্ষম ছাত্ৰক সম্বৰ্দ্ধনা জনোৱা হয়।

ইয়াৰ পিছতে ডিব্ৰুগড় আকাশবাণী কেন্দ্ৰৰ চৌহদত গছপুলি ৰোপনৰ এক কাৰ্যসূচী ৰূপায়ন কৰা হয়। এই কাৰ্যসূচীত উপস্থিত থাকে কেন্দ্ৰটোৰ প্ৰথম ঘোষক আৰু বিশিষ্ট সংগীতজ্ঞ আৰু ইটানগৰ আকাশবাণী কেন্দ্ৰৰ কাৰ্যসূচী মুৰব্বী জে বি নাবাম।

সন্ধিয়া অনুষ্ঠিত বৰ্ষজোৰা সোণালী জয়ন্তী উদযাপনৰ আনুষ্ঠানিক শুভাৰম্ভ অনুষ্ঠানত বিশিষ্ট সাহিত্যিক ড০ নগেন শইকীয়াৰ উপৰি উপস্থিত থাকে সাংসদ ৰামেশ্বৰ তেলী, বিধায়ক প্ৰশান্ত ফুকন, ডিব্ৰুগড়ৰ বিশিষ্ট ব্যক্তিৰ লগতে এক বৃহৎ সংখ্যক ৰাইজ।

নিশা ‘’লোক সংগীত মাধুৰী’’ নামৰ লোক সংগীতৰ ৰিয়েলিটি শ্ব’ৰ বিজয়ীসকলক সম্বৰ্দ্ধনা জনোৱা হয়।