ত্ৰিপুৰাৰ যুৱতীৰ সাফল্য : গৱেষণাৰ বাবে হাৰ্ভাৰ্ডৰ পৰা আহিল প্ৰস্তাৱ

ত্ৰিপুৰাৰ যুৱতী পাতত্ৰি চক্ৰৱৰ্তীয়ে সকলোকে চমকিত কৰি আন এক সাফল্যৰ দিশত খোজ পেলাবলৈ আগবাঢ়িছে। অইন নহয়, বিশ্বৰ আগশাৰীৰ বিশ্ববিদ্যালয় ব’ষ্টনৰ হাৰ্ভাৰ্ড বিশ্ববিদ্যালয়ৰ পৰা পাতত্ৰিলৈ গৱেষণাৰ বাবে প্ৰস্তাৱ আহিছে।

বিশ্ববিদ্যালয়খনৰ নামভৰ্তি আৰু বিত্তীয় সাহায্য শাখাৰ ডীন অধ্যাপক মোহন ডি বুদ্ৰুমৰ দ্বাৰা এই প্ৰস্তাৱ প্ৰেৰণ কৰা হৈছে।

পাতত্ৰিয়ে ইয়াৰ আগেয়েও ৰাজ্যখনত উৎসাহৰ সৃষ্টি কৰিছিল যেতিয়া চাৰি বছৰ আগতে তেওঁ দ্বাদশ শ্ৰেণী উত্তীৰ্ণ হোৱাৰ পিছত নিউয়ৰ্কৰ ষ্টেট ইউনিভাৰ্ছিটিত ইঞ্জিনিয়াৰিঙৰ স্নাতক পাঠ্যক্ৰমত নামভৰ্তিৰ সুবিধা লাভ কৰিছিল।

হাৰ্ভাৰ্ডৰ পৰা অহা পত্ৰখনত কোৱা হৈছে যে বিশ্বৰ বিভিন্ন প্ৰান্তৰ পৰা অহা বহুতো আৱেদনৰ মাজৰ পৰা তেওঁক নিৰ্বাচন কৰিছে আৰু তেওঁলোকে পাতত্ৰিৰ শিক্ষায়তনিক সাফল্যক অভিনন্দন জনাইছে।

তাত তেওঁৰ অধ্যয়নৰ সুবিধাৰ্থে এটি জলপাণি আগবঢ়োৱা হ’ব, এগৰাকী গৱেষণা সহায়ক আৰু এটি শিক্ষণ ফেল’শ্বিপৰ প্ৰস্তাৱ আগবঢ়াইছে। আগৰতলাত সংবাদ মাধ্যমৰ আগত এই বাতৰি প্ৰকাশ কৰি পাতত্ৰিৰ পিতৃ ড০ প্ৰসূন চক্ৰৱৰ্তীয়ে এইদৰে কয়।

ড০ চক্ৰৱৰ্তীয়ে লগতে কয় যে এতিয়া পাতত্ৰি এই মাহতে তেওঁৰ গৱেষণাৰ বিষয়বস্তু নিৰ্বাচনৰ বাবে নিউয়ৰ্কৰ পৰা হাৰ্ভাৰ্ডলৈ উৰা মাৰিব।

পাতত্ৰিয়ে একেধৰণৰ সুযোগ পুৰডিউ বিশ্ববিদ্যালয়, কেচ ৱেষ্টাৰ্ণ বিশ্ববিদ্যালয় আৰু আন দুখন খ্যাতনামা বিশ্ববিদ্যালয়ৰ পৰাও লাভ কৰিছিল।