চূড়ান্ত নাগৰিকপঞ্জী প্ৰকাশৰ এমাহৰ ভিতৰত ২০০ খন নতুন বিদেশী ন্যায়াধিকৰণ কাৰ্য্যক্ষম কৰাৰ বাবে প্ৰশাসনৰ বিশেষ তৎপৰতা
উচ্চতম ন্যায়ালয়ৰ নিৰীক্ষণত চলি থকা এন আৰ চি উন্নীতকৰণৰ কাম প্ৰায় শেষ হৈ আহিছে আৰু চূড়ান্ত এন আৰ চি প্ৰকাশৰ দিনো চমু চাপি আহিছে। চূড়ান্ত নাগৰিকপঞ্জী প্ৰকাশৰ এমাহৰ ভিতৰত ৰাজ্যত ২০০ খন নতুন বিদেশী ন্যায়াধিকৰণ কাৰ্য্যক্ষম কৰি তোলাৰ বাবে প্ৰস্তুতি অব্যাহত ৰাখিছে বিভাগীয় কৰ্তৃপক্ষই।
অসম চৰকাৰৰ গৃহ আৰু ৰাজনৈতিক বিভাগে ইতিমধ্যে ৰাজ্যখনৰ ছয়খন জিলা ক্ৰমে নগাঁও, বঙাইগাঁও, তেজপুৰ, কামৰূপ মহানগৰ, শিলচৰ আৰু যোৰহাটত বিদেশী ন্যায়াধিকৰণ স্থাপন কৰাৰ বাবে জিলাকেইখনৰ উপায়ুক্তক অতিৰিক্ত দায়িত্ব পালনৰ নিৰ্দেশ দিছে।
ইতিমধ্যে গুৱাহাটী উচ্চ ন্যায়ালয়ৰ তত্ত্বাৱধানত ৰাজ্যত স্থাপন হ’বলগীয়া অতিৰিক্ত ২০০ বিদেশী ন্যায়াধিকৰণত নিযুক্তি দিয়াৰ বাবে প্ৰক্ৰিয়া অব্যাহত ৰখা হৈছে। ২২১ জন সদস্য নিযুক্তিৰ বিপৰিতে প্ৰায় পাঁচ শতাধিক প্ৰাৰ্থীয়ে আবেদন কৰাৰ তথ্য লাভ কৰা গৈছে।
প্ৰতিখন বিদেশী ন্যয়াধিকৰণত অতিকমেও দহ গৰাকী সদস্য থাকিব বুলি সূত্ৰৰ পৰা খবৰ লাভ কৰা গৈছে। ইতিমধ্যে ইলেকট্ৰনিক ফৰেনাৰ্ছ ট্ৰিবুনেল প্ৰজেক্টৰ মুখ্য কাৰ্য্যবাহী বিষয়া হিচাপে প্ৰশাসনিক বিষয়া আনন্দ প্ৰকাশ তিৱাৰীক নিযুক্তি দিয়া হৈছে।
আনহাতে, চূড়ান্ত নাগৰিকপঞ্জী প্ৰকাশৰ পাছত বিদেশী ন্যায়াধিকৰণ সমূহত গুৰুত্বপূৰ্ণ ভূমিকা পালনৰ বাবে অসম আৰক্ষীতো ২০০০ টা বিভিন্ন পদত বৃহৎ নিযুক্তি বিচাৰি বিজ্ঞাপন প্ৰকাশ কৰা হৈছে।অসম আৰক্ষীত নিযুক্তি দিবলগীয়া পদসমূহ অস্থায়ীভাৱে নিযুক্তি দিয়া হ’ব যদিও ইয়াৰ কাৰ্য্যকাল বৃদ্ধি কৰাৰ সম্ভাৱনা আছে।
উল্লেখযোগ্য যে, চূড়ান্ত নাগৰিকপঞ্জী প্ৰকাশৰ পাছত যিসকলৰ নাম এন আৰ চিৰ পৰা বাদ পৰিব সেইসকল লোকে বিদেশী ন্যায়াধিকৰণত আবেদন কৰাৰ মাধ্যমেৰে নাগৰিকত্ব প্ৰমাণৰ অন্তিম সুযোগ লাভ কৰিব।