উত্তৰাখণ্ডৰ মহাপ্ৰলয় : এতিয়াও নিখোজ ১৩৬ গৰাকী; মৃত বুলি ঘোষণা কৰিব চৰকাৰে!
উত্তৰাখণ্ডৰ মহাপ্ৰলয়ত এতিয়াও সন্ধানহীন হৈ থকা ১৩৬ গৰাকী লোকক মৃত বুলি ঘোষণা কৰা হ’ব পাৰে। উত্তৰাখণ্ড ৰাজ্যিক দুৰ্যোগ প্ৰশমন বিভাগৰ এক সূত্রই এই সম্ভাৱনাৰ কথা প্ৰকাশ কৰিছে।
সূত্ৰটোৱে প্ৰকাশ কৰা মতে বৰ্তমানলৈকে ৬০ লোকৰ মৃতদেহ উদ্ধাৰকাৰী দলে উদ্ধাৰ কৰিছে আৰু ১৩৬ গৰাকী লোক এতিয়াও নিখোজ হৈ আছে।
এই নিখোজ হৈ থকা ১৩৬ গৰাকী লোকক উত্তৰাখণ্ড চৰকাৰে মৃত্যু হোৱা বুলি ঘোষণা কৰিবলৈ প্ৰস্তুতি চলোৱা বুলি সূত্ৰটোৱে প্ৰকাশ কৰিছে।
উল্লেখ্য যে চলিত মাহৰ প্ৰথমভাগতে উত্তৰাখণ্ডৰ পাহাৰীয়া চামুলী জিলাত হিমবাহ বিস্ফোৰণৰ ফলত সৃষ্টি হোৱা মহাপ্ৰলয়ত প্ৰায় ২০০ লোক নিখোজ হৈছিল।
পাহাৰৰ পৰা বৈ অহা শিল-বালি আৰু পানীৰ সোঁতে বহু এলেকা পুতি পেলোৱাৰ লগতে বহু দলং ধ্বংস আৰু টাণেলো বন্ধ কৰিছিল।
তপোবন-বিষ্ণুগড় হাইড্ৰ’ইলেক্ট্ৰিক প্ৰকল্পটোকো পাহাৰৰ পৰা খহি অহা শিল-বালি পানীয়ে ধ্বংস কৰিছিল। ইয়াত কৰ্মৰত শ্ৰমিককো উতুৱাই নিছিল শিল-বালি পানীৰ ধলে।
উত্তৰাখণ্ড ৰাজ্যিক দুৰ্যোগ প্ৰশমন বাহিনীৰ লগতে ভাৰতীয় স্থল সেনা, নৌ সেনা, বায়ু আৰু আইটিবিপিৰ জোৱানে উক্ত মহাপ্ৰলয়ত নিখোজ হোৱা লোকসকলক উদ্ধাৰৰ বাবে ঐক্যৱদ্ধভাৱে অভিযান চলাইছিল।
উদ্ধাৰকাৰী দলে নিৰন্তৰ উদ্ধাৰ অভিযান চলাই ৬০ টা মৃতদেহ উদ্ধাৰ কৰিবলৈ সক্ষম হৈছে।