‘আমেৰিকাত কোভিড১৯ত আক্ৰান্ত হৈ ১ লাখ লোকৰ মৃত্যু ঘটিব!’; ৰাষ্ট্ৰপতি ড’নাল্ড ট্ৰাম্প

আমেৰিকাত ক’ৰ’না ভাইৰাছত আক্ৰান্ত হৈ প্ৰায় ১ লাখ লোকৰ মৃত্যু হ’ব পাৰে বুলি সতৰ্কবাণী কৰিছে ৰাষ্ট্ৰপতি ড’নাল্ড ট্ৰাম্পে।

এই পৰ্যন্ত আমেৰিকা যুক্তৰাষ্ট্ৰত কোভিড ১৯-ত আক্ৰান্ত হৈ ৬৭,০০০ লোকৰ মৃত্যু হৈছে।

আনহাতে এই বছৰৰ শেষৰফালে ক’ৰ’না ভাইৰাছৰ ভেকচিন তৈয়াৰ হৈ উঠিব বুলি ট্ৰাম্প আশাবাদী। অৱশ্যে দেশখনৰ চিকিৎসা বিশেষজ্ঞসকলৰ মতে ভেকচিন তৈয়াৰ কৰিবলৈ আৰু ১২ৰ পৰা ১৮ মাহ সময় লাগিব।

‘মই ভাৱো এই বছৰৰ শেষৰফালে আমি এটা ভেকচিন পাম। ডাক্তৰসকলে ক’ব, আপুনি সেইটো ক’ব নালাগিছিল। মই যি ভাৱো তাকেই ক’ম…মই ভাৱো আমি সোনকালেই এটা ভেকচিন উলিয়াব পাৰিম।’ Fox Newsৰ আগত ট্ৰাম্পে কয়।

অৱশ্যে দেশখনৰ এগৰাকী শীৰ্ষ সংক্ৰামক ৰোগ বিশেষজ্ঞ ডা০ এন্থনি ফাউচি আৰু ইংলেণ্ডৰ মুখ্য চিকিৎসা বিষয়া ক্ৰিছ হুৱাইটিয়ে ট্ৰাম্পৰ এই অনুমান মানি লোৱা নাই।

ডাঃ ফাউচিয়ে ইতিমধ্যে কৈছে যে কোভিড১৯ৰ ভেকচিন আৱিস্কাৰ কৰিবলৈ আৰু ১৮ মাহ লাগিব। আনহাতে প্ৰফেচৰ হুৱাইটিৰ মতে অহা বছৰ মানতহে কাৰ্যক্ষম ভেকচিন উদ্ভাৱন কৰা সম্ভৱপৰ হ’ব।

উক্ত সাক্ষাৎকাৰত ট্ৰাম্প প্ৰশাসনে ক’ৰ’না প্ৰতিৰোধৰ ক্ষেত্ৰত সঠিক পদক্ষেপ গ্ৰহণত ব্যৰ্থ হোৱা বুলি উঠা অভিযোগ আমেৰিকাৰ ৰাষ্ট্ৰপতিগৰাকীয়ে খণ্ডন কৰে।

ক’ৰ’নাৰ উৎপত্তি আৰু সংক্ৰমণ ৰোধৰ ক্ষেত্ৰত চীনে গাফিলতি কৰিলে বুলি পুনৰ অভিযোগ কৰে ট্ৰাম্পে। ‘মই ভাবো তেওঁলোক ডাঙৰ ভুল কৰিলে আৰু তেওঁলোকে স্বীকাৰ কৰিব খোজা নাই। আমি তালৈ যাব খুজিছো। তেওঁলোকে আমাক যোৱাতো বিচৰা নাই।’ ৰাষ্ট্ৰপতি ট্ৰাম্পে কয়।