মটেৰা ষ্টেডিয়াম ‘নিৰ্মাণ’ আৰু ‘পিংক বল’ টেষ্টৰ বাবে প্ৰধানমন্ত্ৰী আৰু গৃহমন্ত্ৰীক কৃতজ্ঞতা জ্ঞাপন সৌৰভ গাংগুলীৰ

ইংলেণ্ডৰ বিৰুদ্ধে চলিত টেষ্ট শৃংখলাৰ তৃতীয়খন মেচৰ বাবে কেইঘণ্টামান থকাৰ সময়তে টীম ইণ্ডিয়াৰ প্ৰাক্তন অধিনায়ক সৌৰভ গাংগুলীয়ে প্ৰধানমন্ত্ৰী আৰু গৃহমন্ত্ৰীলৈ তেওঁলোকৰ নেতৃত্বৰ বাবে কৃতজ্ঞতা প্ৰেৰণ কৰিছে।

গুজৰাটৰ আহমেদাবাদৰ মটেৰা ক্ৰিকেট ষ্টেডিয়ামত অনুষ্ঠিত হ’বলগা মেচখনত গুলপীয়া বলৰ প্ৰয়োগ কৰা হ’ব, তদুপৰি মেচখন হ’ব দিবা-নৈশ।

উল্লেখযোগ্য যে মটেৰা ষ্টেডিয়াম বৰ্তমান বিশ্বৰ ভিতৰতে আটাইতকৈ বৃহৎ ক্ৰিকেট ষ্টেডিয়াম হিচাপে শেহতীয়াকৈ বিজেপি চৰকাৰে নিৰ্মাণ কৰিছে। সেইবাবেই টেষ্টত সাত হেজাৰ আৰু এদিনীয়া মেচত এঘাৰ হেজাৰৰো অধিক ৰাণ কৰা টীম ইণ্ডিয়াৰ অন্যতম সফল অধিনায়কজনে প্ৰধামন্ত্ৰী আৰু গৃহমন্ত্ৰীক কৃতজ্ঞতা জ্ঞাপন কৰিছে।

উল্লেখযোগ্য বিজেপি চৰকাৰৰ দিনত প্ৰাক্তন মাৰমুখী বেটচমেনজন বিচিচিআইৰ সভাপতি পদতো অধিস্থিত হৈছে। আনহাতে সম্পাদকৰ পদবীত আছে অমিত শ্বাহৰ পুত্ৰ জয় শ্বাহ।

Will miss being at the stadium today ..what an effort it must have been to create this ..pink test was our dream and it’s going be the 2nd one in india.hope to see full stands like last time. Under the leadership of Honble Prime minister @narendramodi Amit Shah @AmitShah .. pic.twitter.com/za7vdYHTN0

— Sourav Ganguly (@SGanguly99) February 24, 2021

এটা টুইটযোগে তেওঁ কয় যে টেষ্টমেচত গুলপীয়া বল খেলোৱাটো ভাৰতৰ সপোন আছিল। ইয়াৰ পূৰ্বে প্ৰথমবাৰৰ বাবে গুলপীয়া বল ব্যৱহাৰ কৰা হৈছিল ইডেন গাৰ্ডেনত।

তদুপৰি তেওঁ টেষ্টমেচখন উপভোগ কৰিবলৈ ষ্টেডিয়ামত থাকিব নোৱাৰাৰ বাবে দুখপ্ৰকাশ কৰে।

আনহাতে মঙলবাৰে এখন সংবাদমেলত টীম ইণ্ডিয়াৰ অধিনায়ক বিৰাট কোহলীয়ে কয় যে বিশ্বৰ ভিতৰতে আটাইতকৈ বৃহৎ এখন ক্ৰিকেট ষ্টেডিয়ামৰ বাবে তেওঁলোক গৰ্বিত হৈছে।

তদুপৰি ষ্টেডিয়ামৰ আন্তঃগাঁঠনি অতি উন্নত বুলি কৈ কোহলীয়ে জনায় যে খেলপথাৰত নামিবলৈ তেওঁলোক আগ্ৰহী হৈ আছে।