ইউক্ৰেইনত যুদ্ধ অপৰাধৰ অভিযোগত প্ৰথমবাৰ বিচাৰৰ সন্মুখীন ৰাছিয়ান সেনা

এজন নিৰস্ত্ৰ ইউক্ৰেনীয় নাগৰিকৰ হত্যাৰ অভিযোগত শুকুৰবাৰে বিচাৰৰ সন্মুখীন হৈছে এজন ৰাছিয়ান সৈনিক। ২৪ ফেব্ৰুৱাৰীত ইউক্ৰেইনত ৰাছিয়াৰ সামৰিক অভিযান আৰম্ভ হোৱাৰ পিছত ইউক্ৰেইনৰ আদালতত উঠা এইটো হৈছে প্ৰথম যুদ্ধ অপৰাধৰ গোচৰ।

ৰাছিয়াৰ চাৰ্জেন্ট ভাদিম ছিছিমাৰিনৰ বিৰুদ্ধে উত্তৰ-পূবৰ চুপাখিভকা গাঁৱত এখন গাড়ীৰ খিৰিকীৰে এজন ৬২ বছৰীয়া ব্যক্তিৰ মূৰত গুলীচালনা কৰাৰ অভিযোগ আছে।

লগতে পঢ়ক: দিল্লীৰ বহুমহলীয়া অট্টালিকাত ভয়াবহ অগ্নিকাণ্ড; অগ্নিদগ্ধ হৈ ২৭ জনৰ মৃত্যু, আহত বহুলোক

যুদ্ধৰ আইন আৰু ৰীতি-নীতি অনুসৰি ইউক্ৰেইনৰ অপৰাধ আইনৰ ধাৰাত বৰ্ণিত শাস্তিৰ অধীনত তেওঁ আজীৱন কাৰাদণ্ডৰ সন্মুখীন হয়।

তেওঁৰ এটৰ্ণী ভিক্টৰ অ’ভছানিকোভে কয় যে তেওঁৰ (ভাদিম ছিছিমাৰিন) বিৰুদ্ধে গোচৰটো শক্তিশালী আছিল। অৱশ্যে, কিধৰণৰ তথ্য প্ৰমাণ উপস্থাপন কৰা হ’ব সেই বিষয়ে কীয়েভৰ আদালতে চূড়ান্ত সিদ্ধান্ত ল’ব।

তেওঁ কয় যে তেওঁ আৰু তেওঁৰ মক্কেলে কেনেদৰে আবেদন কৰিব সেই বিষয়ে এতিয়ালৈকে সিদ্ধান্ত লোৱা নাই।

লগতে পঢ়ক: দুধনৈত আৰম্ভ ৰাষ্ট্ৰীয় মিকটছ ফুটবল প্ৰতিযোগিতা; প্ৰথমখন খেলত নাগালেণ্ডৰ মুখামুখি হ’ল অসম

ইউক্ৰেইনৰ প্ৰচিকিউটৰ জেনেৰেল ইৰিনা ভেনেডিক্টোভাৰ কাৰ্যালয়ে জানিবলৈ দিয়ে যে তেওঁলোকে ৰাছিয়াৰ সৈনিক আৰু চৰকাৰী বিষয়াসহ ৬০০ তকৈও অধিক সন্দেহযুক্তৰ বিৰুদ্ধে ১০,৭০০ তকৈও অধিক সম্ভাৱ্য যুদ্ধ অপৰাধৰ তদন্ত কৰি আছে।