নিশ্চিহ্ন হ’ব হামাছ : গাজাত প্ৰৱেশ কৰি ইজৰাইলে চলাব সামৰিক অভিযান 

হামাছক নিঃশেষ কৰিবলৈ গাজাত সামৰিক অভ্যুত্থান চলাবলৈ সাজু হৈছে ইজৰাইল।

ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে বুধবাৰে এই কথা ঘোষণা কৰে। 

অৱশ্যে গাজাত অভ্যুত্থান কেনেকৈ হ’ব সেই সন্দৰ্ভত তেওঁ বিতংভাৱে কোৱা নাই। 

আনহাতে, যুদ্ধৰ ক্ষেত্ৰত আমেৰিকাৰ ৰাষ্ট্ৰপতি জো বাইডেনে নিজৰ সুৰ সলনি কৰিছে। 

বেঞ্জামিন নেতানিয়াহুৱে বুধবাৰে টেলিভিছনৰ বাৰ্তাযোগে কয় যে ইজৰাইলৰ সেনাই গাজাত প্ৰৱেশ কৰি অভিযান চলাব। এই সিদ্ধান্ত চৰকাৰৰ বিশেষ যুদ্ধ মন্ত্ৰীসভাই গ্ৰহণ কৰে। বিৰোধী নেতাসকলেও এই সিদ্ধান্তক সমৰ্থন কৰিছে। 

নেতানিয়াহুৱে কয় যে আমি স্থলপথেৰে গাজাত প্ৰৱেশ কৰি সামৰিক অভ্যুত্থানৰ বাবে প্ৰস্তুতি চলাইছো। 

তেওঁ ৭ অক্টোবৰত হামাছৰ আক্ৰমণক ইজৰাইলৰ ইতিহাসৰ “ক’লা দিন” বুলি উল্লেখ কৰে।

প্ৰধানমন্ত্ৰীয়ে এই যুদ্ধক ইজৰাইলৰ অস্তিত্বৰ সংগ্ৰাম বুলি অভিহিত কৰে, তেওঁ কয়, ইজৰাইলে এই যুদ্ধত জয়ী হ’ব লাগিব। নেতানিয়াহুৱে কয় যে দেশৰ সুৰক্ষা আৰু নিৰাপত্তাৰ বাবে মই দায়বদ্ধ। এতিয়া মোৰ কাম হৈছে ইজৰাইল আৰু দেশৰ লোকসকলক শত্ৰুৰ পৰা ৰক্ষা কৰা।”

ইফালে বাইডেন প্ৰশাসনে যুদ্ধত সাময়িকভাৱে বিৰতিৰ আহ্বান জনাইছে। দুয়োপক্ষই অস্থায়ী যুদ্ধবিৰতিৰ আহ্বান জনাইছে যাতে গাজালৈ অধিক সাহায্য প্ৰেৰণ কৰিব পৰা যায়। 

অৱশ্যে আমেৰিকাৰ ৰাষ্ট্ৰপতি জো বাইডেনে স্পষ্টকৈ কয় যে যুদ্ধত আমেৰিকা ইজৰাইলৰ পক্ষত আছে। ইজৰাইলৰ নাগৰিকসকলক সুৰক্ষা প্ৰদানৰ বাবে সকলো সহায়ৰ আশ্বাসো দিয়ে।