আই এম এফৰ দাবী! নীতি আয়োগে ভাৰতক চতুৰ্থ বৃহত্তম অৰ্থনীতি বুলি কৰা দাবী ‘অবাস্তৱ’

নীতি আয়োগৰ মুখ্য কাৰ্যবাহী বিষয়া বিভিআৰ সুব্ৰমণিয়ামে শনিবাৰে দাবী কৰে যে ভাৰতে ইতিমধ্যে জাপানক অতিক্ৰম কৰি বিশ্বৰ চতুৰ্থ বৃহত্তম অৰ্থনীতিৰ দেশ হিচাপে পৰিগণিত হৈছে। তেওঁ আৰু কয় যে ভাৰতে বৰ্তমান ৪ ট্ৰিলিয়ন ডলাৰৰ সীমা অতিক্ৰম কৰিছে। এই সাফল্যৰ বাবেই জাপানক এৰি ভাৰত চতুৰ্থ বৃহত্তম অৰ্থনীতিৰ দেশ হিচাপে পৰিগণিত হৈছে। কিন্তু আন্তঃৰাষ্ট্ৰীয় মুদ্ৰা নিধি (আই এম এফ)ৰ শেহতীয়া তথ্যৰ পৰ্যালোচনাৰ পৰা অনুমান কৰিব পাৰি নীতি আয়োগৰ দাবী এক মিথ্যাৰ বাদে একো নহয়।

আই এম এফৰ তথ্য অনুসৰি ভাৰতে জাপানক অতিক্ৰম কৰি ২০২৫ চনত চতুৰ্থ বৃহত্তম অৰ্থনীতি হিচাপে পৰিগণিত হ’ব বুলি সংবাদ সংস্থা এ এন আইয়ে প্ৰকাশ কৰিছিল। কিন্তু ২০২৫ চনৰ এপ্ৰিল মাহৰ ‘বিশ্ব অৰ্থনৈতিক দৃষ্টিভংগী’ৰ পৰা আই এম এফৰ শেহতীয়া পৰ্যালোচনাৰ ভিত্তিত এই পৰিৱৰ্তন বাস্তৱিকতে হৈ উঠা নাই। এই পৰিসংখ্যাই দেখুৱাইছে যে ২০২৪ চনৰ তালিকা অনুসৰি ভাৰত জাপানৰ বহু ওচৰত যদিও বৰ্তমান আই এম এফৰ হিচাপ অনুসৰি ভাৰত এতিয়াও পিছ পৰি আছে। অৱশ্যে আই এম এফৰ পূৰ্বাভাস অনুসৰি ২০২৫ চনৰ ভিতৰত ভাৰতে সামান্য ব্যৱধানত জাপানক অতিক্ৰম কৰি বিশ্বৰ চতুৰ্থ বৃহত্তম অৰ্থনীতিৰ দেশ হিচাপে পৰিগণিত হোৱাৰ  সম্ভাৱনা আছে।

পৰিসংখ্যা আৰু কাৰ্যসূচী ৰূপায়ণ মন্ত্ৰালয়ৰ অধীনস্থ ৰাষ্ট্ৰীয় পৰিসংখ্যা কাৰ্যালয়ে ২০২৪-২৫ বিত্তীয় বৰ্ষৰ চতুৰ্থ ত্ৰৈমাসিক আৰু সম্পূৰ্ণ বিত্তীয় বৰ্ষৰ জিডিপি বৃদ্ধিৰ তথ্য ৩০ মে’ত প্ৰকাশ কৰিব। আইএমএফে ২০২৬ চনত ৬.২ শতাংশ আৰু ২০২৭ চনত ৬.৩ শতাংশ ভাৰতৰ জিডিপি বৃদ্ধিৰ অনুমান কৰিছে। ইফালে ভাৰতীয় ৰিজাৰ্ভ বেংকে ২০২৬ চনত ভাৰতীয় অৰ্থনীতি ৬.৫ শতাংশ বৃদ্ধি পাব বুলি আশা প্ৰকাশ কৰিছে।