টালি-টোপোলা বান্ধিবলৈ আৰু এগৰাকী বাংলাদেশী অভিনেতাক নিৰ্দেশ ভাৰত চৰকাৰৰ

ফাৰ্দৌছ আহমেদৰ পিছত আন এজন বাংলাদেশী অভিনেতা গাজি আব্দুন নুৰক ভাৰতৰ পৰা টালি-টোপোলা বান্ধিবলৈ নিৰ্দেশ দিয়া হৈছে।

ক’লকাতাত এখন নিৰ্বাচনী সভাত ভাগ লোৱা বাবে অভিনেতাজনৰ বিজিনেছ ভিজা বাতিল কৰা হৈছে আৰু তেওঁক ভাৰত ত্যাগৰ নিৰ্দেশ দিয়া হৈছে।

অৱশ্যে অভিনেতা দুজনৰ বিৰুদ্ধে কঠোৰ আৰু তাৎক্ষণিক পদক্ষেপৰ বিপৰীতে বিজেপিৰ হৈ প্ৰচাৰ চলোৱা বাংলাদেশৰ শীৰ্ষ জনজাতি নেতা চান্তু লামাৰ বিৰুদ্ধে এতিয়াও লোৱা হোৱা নাই কোনো ব্যৱস্থা। উত্তৰ আৰু দক্ষিণ বংগৰ জনজাতি-অধ্যুষিত অঞ্চলত গেৰুৱা দলটোৰ হৈ লামাই প্ৰচাৰ চলাইছে।

জি বাংলা টিভি চেনেলৰ জনপ্ৰিয় ধাৰাবাহিক “ৰানি ৰচমনি”ত ৰাজা চাহেব চৰিত্ৰত নুৰে অভিনয় কৰিছিল। কিন্তু ধাৰাবাহিকখনত ইতিমধ্যে ৰাজা চাহেবৰ মৃত্যু ঘটিছে— গতিকে নুৰৰ অনুপস্থিতিয়ে জনপ্ৰিয় ধাৰাবাহিকখনৰ কোনো ক্ষতি নকৰে।

দমদম সমষ্টিৰ সাংসদ, তৃণমূল কংগ্ৰেছৰ প্ৰাৰ্থী তথা জ্যেষ্ঠ নেতা সৌগত ৰয়ৰ এক নিৰ্বাচনী সভাত যোৱা সপ্তাহত নুৰে অংশ লোৱা বুলি অভিযোগ উত্থাপিত হৈছিল।

লগতে পঢ়ক– তৃণমূল প্ৰাৰ্থীৰ হৈ প্ৰচাৰ চলোৱা বাংলাদেশী অভিনেতাক “ভাৰত ত্যাগ”ৰ নিৰ্দেশ

কিন্তু নুৰে জনোৱা মতে তেওঁ মাত্ৰ তৃণমূল নেতা মদন মিত্ৰৰ গাড়ীত গৈছিল আৰু কোনো নিৰ্বাচনী সভাত যোগ দিব বুলি তেওঁৰ কোনো ধাৰণা নাছিল।

নুৰ আৰু ফাৰ্দৌছ দুয়োৱে তেওঁলোকৰ “ভুল” মাফ কৰি দিয়াৰ বাবে ভাৰতীয় কৰ্তৃপক্ষক অনুৰোধ কৰিছে। নিৰ্বাচনী কাম-কাজত অংশগ্ৰহণ তেওঁলোকৰ বিজিনেছ ভিজা চৰ্তৰ নিশ্চিত উলংঘন।

“পৰিণামৰ উমান নোপোৱাকৈ এই কাম কৰা বাবে মই ভীষণ দুঃখিত। মই মোৰ সতীৰ্থ স্থানীয় অভিনেতাসকলৰ অনুৰোধ অগ্ৰাহ্য কৰিব লাগিছিল। কিন্তু মই আৱেগিক হ’লো,” সহ অভিনেত্ৰী পায়েল চৰকাৰৰ অনুৰোধত সভালৈ যোৱা বুলি উল্লেখ কৰি ফাৰ্দৌছৰ মন্তব্য।

অনাহূত বিতৰ্কত সাঙোৰ খোৱা দুয়োজন অভিনেতাকে ক’লকাতাস্থিত বাংলাদেশ উপ উচ্চায়ুক্তই কথা শুনাইছে।