অসমৰ ডিটেনশ্যন কেম্পৰ বন্দীক “কঠিন চৰ্ত”ত মুকলিৰ অনুমতি উচ্চতম ন্যায়ালয়ৰ

অসমৰ ডিটেনশ্যন কেম্পবিলাকৰ বন্দীসকলৰ বিষয়টোত আজি দেশৰ উচ্চতম ন্যায়ালয়ে এটা গুৰুত্বপূৰ্ণ সিদ্ধান্তৰে কয় যে যিসকল বন্দীয়ে ইতিপূৰ্বে ৩ বছৰৰ বন্দিত্বৰ জীৱন কটাইছে, তেওঁলোকক মুকলি আকাশলৈ যাবলৈ দিব পাৰি।

কিন্তু মুখ্য ন্যায়াধীশ ৰঞ্জন গগৈ আৰু ন্যায়াধীশ খান্নাৰ বিচাৰপীঠখনে এই বন্দীসকলক মুকলি কৰি দিয়াৰ বাবে কেইটামান “কঠিন চৰ্ত” আৰোপ কৰি দিয়ে।

নিচেই কমেও তিনি বছৰ বন্দিত্ব জীৱন কটোৱাৰ উপৰি আনবোৰ চৰ্ত হ’ল :

১। দুজন ভাৰতীয়ক জামিনদাৰ হিচাপে গাইপতি ১ লাখকৈ টকাৰ বণ্ড দিব লাগিব

২। মুকলি হোৱাৰ পিছত থাকিব লগীয়া আৰু সত্যাপনীয় (verifiable) ঠিকনা দাখিল কৰিব লাগিব

৩। চকুৰ মণিৰ বায়’মেট্ৰিক তথ্য

৪। হাতৰ দহোটা আঙুলিৰ ছাপ

৫। ডিটেনশ্যন কেম্পৰ পৰা এৰি দিয়াৰ পূৰ্বে উক্ত বন্দীৰ ফটো লৈ সেইবোৰ বিদেশী ন্যায়াধিকৰণৰ সুৰক্ষিত ডেটাবেছত ৰাখিব লাগিব

এই চৰ্তবোৰৰ উপৰি শীৰ্ষ আদালতখনে কয় যে মুকলি আকাশৰ তললৈ যোৱা ব্যক্তিজনে প্ৰতি সপ্তাহত এবাৰকৈ বিদেশী ন্যায়াধিকৰণে নিৰ্ধাৰণ কৰি দিয়া থানাত উপস্থিতি দিব লাগিব।

যদি তেওঁ থকা ঠাইৰ ঠিকনা সলায় নিৰ্দিষ্ট আৰক্ষী থানাখনত খবৰ দিব লাগিব।

আৰক্ষী পৰিদৰ্শকে (সীমান্ত) উক্ত মুক্ত বন্দীৰ সংশ্লিষ্ট থানাত হাজিৰা দিয়া সম্বন্ধে প্ৰতি তিনি মাহৰ মূৰে মূৰে বিদেশী ন্যায়াধিকৰণক প্ৰতিবেদন দিব লাগিব।

চৰ্ত ভংগ কৰিলে চৰ্তাধীনভাৱে মুকলি আকাশৰ তলত থকা ঘোষিত বিদেশীজনক আটক কৰি বিদেশী ন্যায়াধিকৰণত হাজিৰ কৰোৱা হ’ব।

অসমৰ ডিটেনশ্যন কেম্পবোৰত নিৰ্বিচাৰ আৰু মানৱীয় অধিকাৰবোৰৰ অবিহনে বছৰ বছৰ ধৰি বন্দী হৈ থকা বন্দীসকলৰ দুৰ্দশা বিষয়ক এটা গোচৰৰ শুনানি লৈ আজি শীৰ্ষ আদালতখনে এই গুৰুত্বপূৰ্ণ ৰায়টো দিয়ে।

অৱশ্যে ১ লাখ টকাকৈ দুজন জামিনদাৰ যোগাৰ কৰিব পৰাকৈ এই বন্দীসকলৰ কিমানজন সক্ষম হ’ব সেয়া সন্দেহৰ আৱৰ্তত।