কপিলী জলবিদ্যুৎ প্ৰকল্পৰ পাইপলাইন বিস্ফোৰণত ৬০০ কোটি টকাৰ লোকচান

ডিমা হাচাও জিলাৰ উমৰাংচুস্থিত নীপক’ৰ কপিলী জলবিদ্যুৎ প্ৰকল্পৰ পাইপলাইনত সংঘটিত জলবিস্ফোৰণৰ পাছত নীপক’ৰ অধ্যক্ষ আৰু পৰিচালন সঞ্চালক ভি কে সিঙে মঙলবাৰে এই দুৰ্ঘটনাৰ ফলত প্ৰায় ৬০০ কোটি টকাৰ সম্পত্তি ক্ষতিগ্ৰস্ত হয় বুলি উল্লেখ কৰে।

সিঙে প্ৰকল্পটোত আবদ্ধ হৈ থকা কৰ্মচাৰীসকলক উদ্ধাৰৰ বাবে ৯০ জনীয়া দল এটা নিয়োগ কৰা হৈছে বুলিও জানিবলৈ দিয়ে।

‘‘আমি আৱদ্ধ কৰ্মচাৰীসকলক উদ্ধাৰ অভিযানত ৯০ জনীয়া দল এটা নিয়োগ কৰিছো। উদ্ধাৰ অভিযানত জে চি বিকে ধৰি আন সা-সজুলিও ব্যৱহাৰ কৰি আছো,’’ নৰ্থ-ইষ্ট নাওৰ আগত সিঙে কয়।

আনহাতে, দুমহলীয়া পাম্প হাউছটোৰ চাৰিওফালে জমা হোৱা মাটিয়ে উদ্ধাৰ অভিযানত ব্যাঘাত জন্মাইছে বুলিও সিঙে উল্লেখ কৰে।

আবদ্ধ হৈ থকা কৰ্মচাৰী কেইগৰাকীক উদ্ধাৰৰ বাবে প্ৰয়োজনীয় সকলো ধৰণৰ ব্যৱস্থা গ্ৰহণ কৰা হৈছে বুলি তেওঁ কয়।

পাম্পটোত আবদ্ধ হৈ থকা চাৰিগৰাকী লোকৰ ভিতৰত তিনিগৰাকী নীপক’ৰ কৰ্মচাৰী আৰু এগৰাকী সাধাৰণ শ্ৰমিক।

সিঙে অঞ্চলটোত চলি থকা কয়লা খননকে দুৰ্ঘটনাটোৰ মুখ্য কাৰণ হিচাপে অভিহিত কৰে।

‘‘আমি পূৰ্বতে কেন্দ্ৰৰ লগতে মেঘালয় আৰু অসম চৰকাৰক ওচৰৰ কয়লা খনিৰ পৰা বৈ অহা পানীয়ে কপিলীৰ পানীত এছিডৰ পৰিমাণ বৃদ্ধি কৰিছে বুলি অৱগত কৰিছিলো,’’ সিঙে কয়।

বিগত কেইবাবছৰৰ পৰা প্ৰকল্পটোৰ আশেপাশে থকা অঞ্চলসমূহত অত্যাধিক হাৰত কয়লা খনন চলি আহিছে বুলিও সিঙে প্ৰকাশ কৰে।

আনহাতে, ২০০৬ চনতে প্ৰথমবাৰৰ বাবে কপিলীৰ পানীত এছিডৰ উপস্থিতি ধৰা পৰিছিল আৰু এই সম্বন্ধে নীপক’ই বিভাগীয় কৰ্তৃপক্ষক সমূহক অৱগত কৰি আহিছে বুলিও তেওঁ উল্লেখ কৰে।

যদিও এই ক্ষেত্ৰত কিছু পৰিমাণে ব্যৱস্থা গ্ৰহণ কৰা হৈছে কিন্তু সেয়া পৰ্য্যাপ্ত নহয় বুলি পৰিচালন সঞ্চালক গৰাকীয়ে জানিবলৈ দিয়ে।