আই পি এফৰ অনিৰ্দিষ্টকালীন ডিমা হাছাও বন্ধ প্রত্যাহাৰ; ১৭ ফেব্রুৱাৰিত দিচপুৰত বৈঠক

ৰাজ্য  চৰকাৰৰ পৰা লিখিত প্রতিশ্রুতি পোৱাৰ পাছত অনির্দিষ্টকালীন ডিমা হাছাও বন্ধ প্রত্যাহাৰ কৰিলে ইণ্ডিজেনাছ পীপলছ ফ’ৰামে।

যোৱা নিশা হাফলঙৰ মৌলহৈ কমিউনিটি হলত এখন সংবাদমেল পাতি  বন্ধ প্রত্যাহাৰৰ কথা ঘোষণা কৰিছে আই পি এফৰ সভাপতি এল কুকিয়ে।

পৃথক স্বায়ত্তশাসিত জিলা গঠনৰ দাবীত সংগঠনটোৱে ১১ ফেব্ৰুৱাৰিৰ পৰা অনিৰ্দিষ্টকালীন ডিমা হাছাও বন্ধৰ আহ্বান দিছিল।

সংবাদ মাধ্যমৰ আগত কুকিয়ে কয় চৰকাৰৰ ফালৰ পৰা ১৭ ফেব্রুৱাৰিত দিচপুৰত পৃথক জিলা গঠন সন্দৰ্ভত বৈঠক অনুষ্ঠিত হ’ব।

লগতে পঢ়ক হাফলঙত বন্ধৰ নামত হিংসাত্মক ঘটনা; ডি এফ অ’ক নমাই লৈ জ্বলাই দিয়া হ’ল চৰকাৰী গাড়ী

এই বৈঠকৰ প্ৰতিশ্ৰুতি দি চৰকাৰৰ হৈ ডিমা হাছাও জিলাৰ উপায়ুক্ত অমিতাভ ৰাজখোৱাই আই পি এফক পত্ৰ প্ৰেৰণ কৰে।

উক্ত দিনা বিয়লি ৪ বজাত দিচপুৰ সচিবালয়ৰ শিক্ষা আৰু বিত্ত দপ্তৰৰ মন্ত্রীৰ কনফাৰেন্স হলত উপৰোক্ত বৈঠক অনুষ্ঠিত হ’ব।

উল্লেখযোগ্য যে ১১ ফেব্ৰুৱাৰিৰ পুৱা ৫ বজাৰ পৰা আৰম্ভ হোৱা এই বন্ধত প্ৰথম দিনটোতে কেইবাটাও হিংসাত্মক ঘটনা ঘটিছিল।

বন্ধৰ সমৰ্থকে ৰাজপথত চলাচল কৰা যান-বাহনৰ ওপৰত আক্ৰমণ চলোৱাৰ উপৰি জ্বলাই দিছিল চৰকাৰী বাহন।