বিজেপি নেতাৰ ইছলাম-কুৰআনৰ “কলংক’’ৰ প্ৰত্যুত্তৰত প্ৰকাশ “ভ্ৰান্তি ভংগ”

বিজেপি নেতা সত্য ৰঞ্জন বৰাৰ বিতৰ্কিত “ইছলাম আৰু কুৰআনৰ কলংকিত কথাবোৰ”ৰ প্ৰত্যুত্তৰত বৃহস্পতিবাৰে প্ৰকাশ পাইছে “ভ্ৰান্তি ভংগ” শীৰ্ষক এক গ্ৰন্থ।

হাফিজ মৌলানা হিদায়াতুল ৱাদুদ কাছিমীৰ সম্পাদনাত প্ৰকাশিত গ্ৰন্থখন গুৱাহাটীৰ দিছপুৰ প্ৰেছ ক্লাবত উন্মোচন কৰা হয়।

কিতাপখনৰ উন্মোচনী অনুষ্ঠানটোৰ সভাপতি চৈয়দ ইফতিখাৰ হুছেইনৰমতে, বৰাৰ কিতাপখনৰ দাবী “সত্যৰ ওপৰত প্ৰতিষ্ঠিত নহয়” আৰু সেয়ে ৰাইজৰ “ভ্ৰান্তি ভংগ” কৰাৰ বাবে এই গ্ৰন্থ প্ৰকাশ কৰি উলিওৱা হৈছে।

“ইছলাম ধৰ্মৰ বিষয়ে সত্য ৰঞ্জন বৰাৰ কোনো অভিজ্ঞতা নাই বা অধ্যয়ন নাই। সেয়েহে তেওঁ বিতৰ্কিত কথাৰে ইছলাম আৰু কোৰআনক লৈ কেতবোৰ প্ৰশ্নৰ লগতে  অভিযোগ উত্থাপন কৰিছে,” হুছেইনে কয়।

কোনো ধৰ্মই ইজনে সিজনক ঘৃণা কৰিবলৈ নিশিকায়, বৰাৰ দাবীক অগ্ৰাহ্য কৰি হুছেইনে কয়। “আমাৰ নামৰ পাৰ্থক্য থাকিব পাৰে, কিন্তু আমি সকলো একেটা পৰিয়ালৰ।”

তেওঁলোকে ধৰ্ম নিৰ্বিশেষে অসমৰ সকলোকে কিতাপখন অধ্যয়ন কৰিবলৈ অনুৰোধ জনাইছে।

সম্পাদনা সমিতিৰমতে, “ভ্ৰান্তি ভংগ”ত কোনোধৰণৰ সাম্প্ৰদায়িক মন্তব্য নাই।

কিতাপখনৰ ব্যৱস্থাপনা আৰু পৰিকল্পনা ইছলামিক ষ্টাডিজ এণ্ড ৰিচাৰ্ছ একাডেমিৰ।