মুখ্যমন্ত্ৰীৰ পৰিয়ালৰ ঘনিষ্ঠ ব্যৱসায়ী অশোক ধানুকালৈ পশ্চিমবংগ চিআইডিয়ে কিয় জাৰি কৰিলে চমন?

ঝাৰখণ্ডৰ বিধায়ক কিনা বেচা সংক্ৰান্তীয় গোচৰত পশ্চিমবংগ আৰক্ষীৰ চমন লাভ কৰিছে গুৱাহাটীৰ ব্যৱসায়ী তথা মুখ্যমন্ত্ৰীৰ পৰিয়ালৰ ঘনিষ্ঠ ব্যৱসায়ী অশোক ধানুকাই ৷ এই খবৰ প্ৰকাশ পাইছে পশ্চিমবংগৰ লগতে অসমৰ কেইবাটাও সংবাদ মাধ্যমত।

ধানুকাক সোমবাৰে কলকাতাত চি আই ডিৰ ওচৰত হাজিৰ হ’বলৈ নিৰ্দেশ দিয়া হৈছে বুলি বাতৰিত প্ৰকাশ পাইছে।

উল্লেখ্যোগ্য যে, প্ৰায় ৫০ লাখ টকাসহ ঝাৰখণ্ডৰ তিনি কংগ্ৰেছী বিধায়ক পশ্চিমবংগৰ চি আই ডিৰ জালত পৰিছিল। ঝাৰখণ্ডৰ বিধায়ককেইজনৰ গাড়ীৰ পৰা উদ্ধাৰ হৈছিল নগদ প্ৰায় ৫০ লাখ টকা ৷ লগে লগে প্ৰশ্ন উত্থাপিত হৈছিল ক’ৰ পৰা বিধায়ক তিনিজনৰ হাতলৈ আহিল ৫০ লাখকৈ টকা।

প্ৰকাশিত বাতৰি অনুসৰি, গুৱাহাটীলৈ আহি তেওঁলোকে অসমৰ এজন ব্যৱসায়ীক সাক্ষাৎ কৰিছিল আৰু এই ব্যৱসায়ীৰ জৰিয়তে পশ্চিমবংগত তেওঁলোকক নগদ ধনখিনি দিয়াৰ ব্যৱস্থা কৰিছিল ৷

তথ্য অনুসৰি কলকাতাৰ এজন ব্যৱসায়ীয়ে ঝাৰখণ্ডৰ তিনি বিধায়কৰ হাতত ধন তুলি দিছিল। এই ব্যৱসায়ীগৰাকীক জেৰা কৰাৰ পাছতেই অসমৰ ব্যৱসায়ী অশোক ধানুকাকো চমন দিছে পশ্চিমবংগৰ চি আই ডিয়ে ৷

লগতে পঢ়ক: বিজেপিৰ পষেকজোৰা ত্ৰিৰংগা পতাকা উত্তোলনৰ বিৰোধিতা অখিল গগৈৰ; পুনৰ কা-আন্দোলনৰ বাবে সাজু ৰাইজৰ দল

সুত্ৰ অনুসৰি দেওবাৰে পশ্চিমবংগ আৰক্ষীৰ এটা দল আহি গুৱাহাটীৰ আঠগাঁওস্থিত অশোক ধানুকাৰ বাসগৃহত তেওঁক সোমবাৰে অৰ্থাৎ ৮ জুলাইৰ দিনা পশ্চিমবংগৰ চিআইডি কাৰ্য্যালয়ত হাজিৰ হ’বৰ বাবে চমন দি গৈছিলহি।

ইপিনে, ক্ৰছ কাৰেন্ট নামৰ অসমৰ এটা স্থানীয় পৰ্টেলত প্ৰকাশিত বাতৰি অনুসৰি মুখ্যমন্ত্ৰীৰ পুত্ৰৰ সৰ্বাধিক অংশীদাৰিত্ব থকা বশিষ্ঠ ৰিয়েল্টৰ্ছ প্ৰাইভেট লিমিটেড (পূৰ্বৰ আৰ বি এছ ৰিয়েলল্টৰ্ছ প্ৰাইভেট লিমিটেড)ৰ সঞ্চালকৰ পদত আছে অশোক ধানুকা ৷ আনকি পিপিই কীট কেলেংকাৰীৰ সৈতেও নাম সাঙোৰ খাইছিল গুৱাহাটীৰ ব্যৱসায়ী তথা মুখ্যমন্ত্ৰী পৰিয়ালৰ ব্যৱসায়িক সহযোগী অশোক ধনুকাৰ।

লগতে পঢ়ক: Anti-Corruption Drive: ৩৫ হেজাৰ উৎকোচ লৈ হাতে-লোটে ধৰা পৰিল মাটিয়া থানাৰ সহকাৰী উপ পৰিদৰ্শক চবিন পাল দাস

এই বাতৰি প্ৰকাশ পোৱাৰ পাছতে প্ৰতিক্ৰিয়া প্ৰকাশ কৰিছে প্ৰদেশ কংগ্ৰেছৰ মিডিয়া বিভাগৰ অধ্যক্ষ মনজিত মহন্তই।  “অশোক ধানুকাৰ আঠগাঁওৰ বাসগৃহলৈ পশ্চিমবংগৰ চিআইডিৰ দল যোৱাৰ সময়ত অসম আৰক্ষীৰ এটা বৃহৎ দলে পহৰা দি আছিল। এজন ব্যৱসায়ীৰ ঘৰৰ সন্মুখত অসম আৰক্ষীৰ পহৰা কিয়? এই ঘটনাৰ সৈতে কোন জড়িত হৈ আছে সেয়া লাহে লাহে উন্মোচিত হ’ব ধৰিছে। আমি অপেক্ষা কৰিছো আৰু আশা কৰিছো সত্য প্ৰতিষ্ঠা হ’ব”।