চৰকাৰৰ ওপৰত ভৰসা নাই: কৃষি আইন বাতিলৰ আৰ্জিৰে উচ্চতম ন্যায়ালয়ৰ দ্বাৰস্থ প্ৰতিবাদী কৃষক
নৰেন্দ্ৰ মোদী নেতৃত্বাধীন বিজেপি চৰকাৰৰ ওপৰত মুঠেও আস্থা নোহোৱা হৈ পৰিছে দিল্লীত প্ৰতিবাদ অব্যাহত ৰখা কৃষকসকলৰ।
সেয়ে চৰকাৰলৈ আশা নকৰি এইবাৰ তিনিখনকৈ বিতৰ্কিত কৃষি বিধেয়ক বাতিলৰ আৰ্জিৰে উচ্চতম ন্যায়ালয়ৰ কাষ চাপিল প্ৰতিবাদী কৃষকসকলে।
আজি ভাৰতীয় কিষাণ ইউনিয়নে উচ্চতম ন্যায়ালয়ত তিনিওখন কৃষি আইন বাতিল কৰাৰ আহ্বানেৰে এখন আবেদন দাখিল কৰে।
ভাৰতীয় কিষাণ ইউনিয়নৰ সভাপতি ভানু প্ৰতাপ সিঙে প্ৰকাশ কৰা মতে চৰকাৰে কৃষকসকলক আলোচনাৰ নামত কেৱল প্ৰতাৰণাহে কৰি আহিছে।
কৃষি আইন বাতিল নোহোৱালৈকে কৃষকসকল ক্ষান্ত নহয় বুলিও তেওঁ স্পষ্ট কৰি দিয়ে।তেওঁ শীঘ্ৰে ৰে’ল ৰোকো আন্দোলন আৰম্ভ কৰা হব বুলিো সকিয়াই দিয়ে।
ইপিনে কেন্দ্ৰীয় চৰকাৰৰ তিনিখন নতুন কৃষি আইনক কেন্দ্ৰ কৰি দিল্লীৰ সিঙ্ঘু সীমান্তত প্ৰতিবাদ সাব্যস্ত কৰি থকা কৃষকসকলৰ বিৰুদ্ধে গোচৰ ৰুজু কৰিছে আৰক্ষীয়ে।
প্ৰতিবাদকাৰী কৃষকসকলৰ বিৰুদ্ধে সামাজিক দূৰত্ব মানি নচলা, মহামাৰী আইনৰ লগতে আন বহুতো ধাৰাৰ অধীনত গোচৰ ৰুজু কৰা হৈছে।
সিঙ্ঘু সীমান্তত নিযোজিত দুজন শীৰ্ষ পৰ্যায়ৰ আৰক্ষী বিষয়া ক’ৰ’না ভাইৰাছৰ দ্বাৰা সংক্ৰমিত হোৱাৰ পিছতে কৃষকসকলৰ ওপৰত গোচৰ ৰুজু কৰাৰ সিদ্ধান্ত লয়।
উল্লেখ্য যে সিঙ্ঘু সীমান্তত কৃষকসকলে পথ অৱৰোধ কৰি প্ৰতিবাদ সাব্যস্ত কৰি আছে। যোৱা ২৯ নৱেম্বৰত লামপুৰ সীমান্তৰ পৰা হাজাৰ হাজাৰ কৃষক বলপূৰ্বক দিল্লীৰ সীমাত প্ৰৱেশ কৰিছিল। ইয়াৰ পিছত সিঙ্ঘু সীমান্ততে প্ৰতিবাদত বহে কৃষকসকল।
বিগত ১৬ দিন ধৰি প্ৰতিবাদ সাব্যস্ত কৰি থকা এই কৃষকসকলৰ অধিকাংশই পঞ্জাৱ আৰু হাৰিয়ানাৰ। ইয়াৰ উপৰি দেশৰ আন আন প্ৰান্তৰ পৰাও কৃষকৰ দল গৈ এই প্ৰতিবাদত অংশ লৈছে।
কৃষকসকলে এই নতুন কৃষি আইন কেইখন প্ৰত্যাহাৰৰ দাবীত এইদৰে প্ৰতিবাদ সাব্যস্ত কৰি আছে। অৱশ্যে ইয়াৰ মাজতে কেন্দ্ৰীয় চৰকাৰ আৰু কৃষকৰ মাজত আলোচনাও হৈছে, কিন্তু এই পৰ্যন্ত কোনো সমাধান সূত্ৰ ওলোৱা নাই।