মৰণোত্তৰ প্ৰতিবেদন সলাই দিয়াৰ বাবে ধন লওঁতেই গ্ৰেপ্তাৰ হ’ল জি এম চি এইচ্ছৰ চিকিৎসক
মৰণোত্তৰ পৰীক্ষাৰ নামত বেহা চলাই থকা জি এম চি এইচ্ছৰ এজন চিকিৎসকক আজি দুৰ্নীতি নিবাৰক শাখাক হাতে-লোটে ধৰাই মৃতকৰ পৰিয়ালে। চিকিৎসকজনৰ নাম মনোজ বৈশ্য।
তেওঁৰ বিৰুদ্ধে দুৰ্নীতি নিবাৰক শাখাত অভিযোগ দিয়া হৰেন কুমাৰ নামৰ লোকজনৰ ভায়েক ৰামেশ্বৰ প্ৰসাদ শ্বাহৰ চিকিৎসাধীন অৱস্থাত যোৱা ১৯ অক্টোবৰত জি এম চি এইচ্ছত মৃত্যু হৈছিল।
ককায়েকে জানিবলৈ দিয়ামতে, ঘৰৰ বাথৰূমত পৰি আহত হোৱা বাবে শ্বাহক চিকিৎসালয়খনত ভৰ্তি কৰোৱা হৈছিল।
শ্বাহৰ মৃতুৰ পিছত মৰণোত্তৰ পৰীক্ষাৰ প্ৰতিবেদনৰ নামত চিকিৎসক মনোজ বৈশ্যই পৰিয়ালটোক ধন বিচাৰি হাৰাশাস্তি কৰি আহিছিল বুলি জানিবলৈ দিছে হৰেন কুমাৰে। টকা-পইচা নিদিয়াত কেতিয়াও মাছ মাংস-নোখোৱা ৰামেশ্বৰৰ মৰণোত্তৰৰ প্ৰতিবেদনত অত্যধিক সুৰা আৰু মাংসৰ উপস্থিতি পোৱা বুলি প্ৰতিবেদন দিয়ে ডাঃ মনোজ বৈশ্যই।
পৰিয়ালৰ লোকে প্ৰতিবেদনটোত অসন্তুষ্ট হৈ পুনৰ চিকিৎসকজনৰ কাষ চাপে আৰু জনায় যে মৃত শ্বাহে কেতিয়াও মদ নাখাইছিলেই।
তেতিয়া মৰণোত্তৰ প্ৰতিবেদন সলনি কৰি দিয়াৰ প্ৰতিশ্ৰুতিৰে চিকিৎসকজনে তাৰ বাবে হৰেন কুমাৰৰ পৰা ৫০ হাজাৰ টকা বিচাৰে।
প্ৰথম অৱস্থাত হৰেন কুমাৰে চিকিৎসকজনক ৪হাজাৰ টকা দিয়ে আৰু বাকী অলপ টকা আজি দিয়াৰ কথা আছিল।
কিন্তু একে সময়তে দুৰ্নীতি নিবাৰক শাখাক চিকিৎসকজনৰ ধন দাবীৰ বিষয়ে জনায় হৰেন কুমাৰে।
পূৰ্ব পৰিকল্পনামতে আজি হৰেন কুমাৰে ৮ হাজাৰ টকা দিওঁতেই দুৰ্নীতি নিবাৰক শাখাৰ এটা দলে জি এম চি এইচ্ছৰ পৰা ডা: মনোজ বৈশ্যক প্ৰথমে আটক আৰু পিছত গ্ৰেপ্তাৰ কৰে।
ডা: বৈশ্যক বৰ্তমান দুৰ্নীতি নিবাৰক শাখাই জেৰা অব্যাহত ৰাখিছে আৰু আন কিছু লোকো জালত পৰাৰ সন্দেহৰ থল আছে।