ৰাজ্যত এবছৰৰ বাবে নিষিদ্ধ হ’ল গুটখা, পাণ মছলা জাতীয় সামগ্ৰী

ৰাজ্যত এবছৰৰ বাবে নিষিদ্ধ হ’ল গুটখা, পাণ মছলা আৰু তেনেধৰণৰ অন্য সামগ্ৰী। ৰাজ্যৰ খাদ্য সুৰক্ষা বিভাগে গুটখা, পাণ মছলাৰ ক্ষেত্ৰত আনিছে কিছু প্ৰতিবন্ধকতা। নৰ্থ ইষ্ট নাওৰ সৈতে হোৱা টেলিফোনিক বাৰ্তালাপত এই কথা জানিবলৈ দিয়ে খাদ্য সুৰক্ষা বিভাগৰ বিষয়া চম্পক পাঠকে।

যোৱা ২২ নৱেম্বৰতে বিভাগে জাননী জাৰি কৰিছিল যদিও আজিহে খবৰটো পোহৰলৈ আহে।

এতিয়াৰে পৰা ৰাজ্যত গুটখা, পান মচলাৰ উৎপাদন, সংৰক্ষণ, পৰিবহণ আৰু বিক্ৰী কৰিব নোৱাৰিব বুলি জাননীত স্পষ্টকৈ উল্লেখ কৰিছে।

ইয়াৰ সমান্তৰালকৈ ধঁপাত আৰু নিকটিনজাতীয় সামগ্ৰীৰ বিৰুদ্ধেও কঠোৰ হৈছে ৰাজ্য চৰকাৰৰ খাদ্য সুৰক্ষা বিভাগ।

যদি কোনো ব্যক্তি এনেধৰণে গুটখা, পাণ মচলা, ধঁপাত জাতীয় সামগ্ৰী উৎপাদন, বিক্ৰী বা তেনেধৰণৰ কোনো কামৰ লগত জড়িত হয় তথা এই কথা প্ৰশাসনৰ দৃষ্টিগোচৰ হয় তেতিয়া সেই ব্যক্তি আইন অনুসৰি দণ্ডনীয় হ’ব বুলিও জাননীখনত উল্লেখ কৰিছে।

উল্লেখযোগ্য যে মহাৰাষ্ট্ৰ, মধ্য প্ৰদেশ, কেৰেলা, বিহাৰ, গুজৰাট, হাৰিয়ানা, পশ্চিম বংগকে ধৰি অন্য বহু ৰাজ্যত সম্পূৰ্ণৰূপে নিষিদ্ধ গুটখা আৰু পাণ মচলা।

আনহাতে গুটখা নিষিদ্ধ কৰিবলৈ অসম চৰকাৰে ২০১৩ চনত ধঁপাত (গুটখা, পাণমচলা, জৰ্দা) বিৰোধী আইন প্ৰস্তুত কৰিছিল। কিন্তু এই আইন প্ৰস্তুত কৰাৰ পাছতে গুটখা প্ৰস্তুত কোম্পানীয়ে উচ্চ ন্যায়ালয়ত এই আইনৰ বিৰুদ্ধে গোচৰ তৰিছিল। ৰাজ্য চৰকাৰক এই আইন কিয় ল’ব লগীয়া হ’ল বুলি প্ৰশ্ন কৰাত উত্তৰত মন্ত্ৰী হিমন্ত বিশ্ব শৰ্মাই “ই কেন্সাৰ বিয়পোৱাৰ অন্যতম কাৰণ” বুলি কৈছিল।