অৰুণাচল প্ৰদেশত চীনা সৈন্য: গুৰুত্বপূৰ্ণ বিবৃতি জাৰি ভাৰতীয় সেনাৰ
অৰুণাচল প্ৰদেশত চীনা সৈন্যই দলং নিৰ্মাণ কৰি থকা বুলি প্ৰচাৰিত বাতৰি সন্দৰ্ভত বুধবাৰে জৰুৰী বিবৃতি জাৰি কৰিছে ভাৰতীয় সেনাই।
সংবেদনশীল বিষয়টো সন্দৰ্ভত প্ৰকাশিত বাতৰিসমূহৰ সত্যতা ভাৰতীয় সেনাই সম্পূৰ্ণৰূপে অগ্ৰাহ্য কৰিছে।
বিজেপি সাংসদ তাপিৰ গাৱেও অসমৰ চুবুৰীয়া ৰাজ্যখনৰ এঞ্জ’ জিলাত চীনা সৈন্যই দলং নিৰ্মাণ কৰি থকা বুলি দাবী কৰিছিল।
চীন আৰু ভাৰত দুয়ো পক্ষৰ সেনাই সময়ে-সময়ে এলেকাটোত তহল দিয়ে, ভাৰতীয় সেনাৰ বিবৃতিত প্ৰকাশ।
“‘কিছুমান ইলেকত্ৰনিক চেনেল’ত প্ৰকাশিত বাতৰিত উল্লেখিত এলেকাটো ফিশ্ব টেইল এৰিয়া। আন বহু ঠাইৰ দৰে লাইন অৱ এক্সুৱেল কন্ত্ৰ’লৰ শাৰীক লৈ পৃথক পৃথক ধাৰণা আছে,” ভাৰতীয় সেনাৰ স্পষ্টীকৰণ।
এলেকাটোত চীনা সৈন্য বা লোকৰ স্থায়ী উপস্থিতি নাই বুলি উল্লেখ কৰি ভাৰতীয় সেনাই কৈছে যে অঞ্চলটো তেওঁলোকৰ নিৰীক্ষণৰ অধীন।
ভাৰতীয় সেনাই সদৰী কৰা মতে, হাবিৰে ভৰা অঞ্চলটোৰ জান-জুৰিবোৰ পাৰ হ’বলৈ তহলদাৰী সৈন্যই অস্থায়ী দলং নিৰ্মাণ কৰে।
ভাৰত-চীনৰ মাজত যিকোনো সীমা সমস্যা মোকাবিলাৰ বাবে দুয়ো দেশৰ মাজত সুপ্ৰতিষ্ঠিত কূটনৈতিক আৰু সামৰিক ব্যৱস্থা থকা বুলি বিবৃতিটোত কোৱা হৈছে।
“২০০৫ চনৰ ৰাজনৈতিক পেৰামিটাৰ আৰু নিৰ্দেশিকা নীতি সম্পৰ্কীয় বুজাবুজিৰ আধাৰত সীমা প্ৰশ্নটোৰ এক পক্ষপাতহীন, যুক্তিপূৰ্ণ আৰু দুয়োপক্ষৰে গ্ৰহণযোগ্য মীমাংসাৰ দিশে কাম কৰিবলৈ দুয়ো দেশ সন্মত হৈছে,” বিবৃতিটোত প্ৰকাশ।