চাকৰি আশা দি পঠাইছিল যুদ্ধলৈ : ৰুছ-ইউক্ৰেনৰ যুদ্ধত মৃত্যু ভাৰতীয় যুৱকৰ
কেইদিনমান আগতে পোহৰলৈ আহিছিল এটা চাঞ্চল্যকৰ তথ্য । যুদ্ধোন্মাদ ৰাছিয়াত থকা বিদেশী নাগৰিক সকলক ৰাছিয়াৰ হৈ যুদ্ধ কৰিবলৈ বাধ্য কৰাইছে ৰাছিয়াৰ চৰকাৰে। বিভিন্ন দেশৰ পৰা গৈ ৰাছিয়াত থকা নাগৰিক সকল অনিচ্ছুক হৈও ৰাছিয়াৰ চৰকাৰৰ নিৰ্দেশ অনুসৰি যুদ্ধত নামিবলৈ বাধ্য হৈ পৰিছে।
ৰাছিয়াত যুদ্ধ কৰিবলৈ বাধ্য হোৱা ৭ জন ভাৰতীয়ই চৰকাৰৰ সহায় বিচাৰিছে। তেওঁলোকে চলিত সপ্তাহত দুটাকৈ ভিডিঅ’ মুকলি কৰিছে, ভিডিঅ’ৰ যোগে তেওঁলোকে তেওঁলোকক ৰাছিয়াৰ পৰা স্বদেশলৈ ঘূৰাই আনিবলৈ ভাৰত চৰকাৰৰ সহায় বিচাৰিছে। জানিব পৰা মতে, তেওঁলোক ৰাছিয়া-ইউক্ৰেইন সীমান্তত আৱদ্ধ হৈ আছে।
ইয়াৰ পিছতে এতিয়া পোহৰলৈ আহিছে আন এটা খবৰ। ৰাছিয়াৰ হৈ ইউক্ৰেইনৰ বিৰুদ্ধে যুঁজি থকা অৱস্থাত শ্বহীদ হ’ল এজন ভাৰতীয় যুৱক।
জানিব পৰা মতে মিছা প্ৰলোভন দি যুৱকজনক ৰাছিয়াৰ সেনাবাহিনীত যোগদান কৰোৱা হৈছিল। যুৱকজনৰ মৃত্যুৰ খবৰ মস্কোত থকা ভাৰতীয় দূতাবাসেও নিশ্চিত কৰিছে।
জানিব পৰা মতে মৃত যুৱকজনৰ নাম মহম্মদ আছফান। তেওঁৰ ঘৰ হায়দৰাবাদত। বৈদেশিক পৰিক্ৰমা মন্ত্ৰালয়ে ভাৰতীয় যুৱকজনৰ ৰাছিয়াত মৃত্যু হোৱাটো নিশ্চিত কৰাৰ বিপৰীতে তেওঁৰ মৃত্যু কেনেকৈ হৈছিল বা ৰাছিয়াত যুৱকজনে কি কৰি আছিল সেই সম্পৰ্কে কোনো তথ্য পোৱা নাই।
বৈদেশিক পৰিক্ৰমা মন্ত্ৰালয়ে কৈছে , “তেওঁৰ পৰিয়াল আৰু ৰাছিয়াৰ কৰ্তৃপক্ষৰ সৈতে আমি যোগাযোগত আছো। তেওঁৰ মৃতদেহ ভাৰতলৈ অনাৰ প্ৰয়াস কৰা হৈছে।”
প্ৰসংগক্ৰমে, কেৱল আছফানেই নহয়, কমেও ২৪ জন ভাৰতীয় যুৱকক চাকৰি আৰু অন্যান্য প্ৰৰোচনাৰে ৰাছিয়ালৈ লৈ যোৱা হৈছে আৰু তাত সেনাবাহিনীত যোগদান কৰিবলৈ বাধ্য হৈছে।
We have learnt about the tragic death of an Indian national Shri Mohammed Asfan. We are in touch with the family and Russian authorities. Mission will make efforts to send his mortal remains to India.@MEAIndia
— India in Russia (@IndEmbMoscow) March 6, 2024
২১ ফেব্ৰুৱাৰীত এম আই এমৰ মুৰব্বী আছাউদ্দিন ৱাইচিয়ে প্ৰথমে এই তথ্য প্ৰকাশ কৰিছিল। তেওঁ কয় যে তেলেংগানা, গুজৰাট, কৰ্ণাটক, জম্মু-কাশ্মীৰ আৰু উত্তৰ প্ৰদেশৰ বহু যুৱকক প্ৰলোভিত কৰি বলপূৰ্বকভাৱে যুদ্ধক্ষেত্ৰলৈ প্ৰেৰণ কৰা হৈছিল। তেওঁ এই সন্দৰ্ভত বৈদেশিক মন্ত্ৰী এছ জয়শংকৰলৈও এখন পত্ৰ লিখিছিল। পিছত বৈদেশিক পৰিক্ৰমা মন্ত্ৰালয়েও জনাইছে যে কমেও ২০ জন ভাৰতীয় ৰাছিয়াত আবদ্ধ হৈ আছে।