আৰক্ষী ৰাজ! প্ৰশ্ন নুসুধিব; ট্ৰেফিক নিয়ম সম্পৰ্কত প্ৰশ্ন সোধাৰ বাবেই সাংবাদিকক প্ৰহাৰ আৰক্ষীৰ

আৰক্ষীক প্ৰশ্ন নকৰিব। সাংবাদিক হ’লেও প্ৰশ্ন কৰিব নোৱাৰিব আৰক্ষীক। প্ৰশ্ন কৰিয়েই আৰক্ষীৰ শাৰীৰিক নিৰ্যাতনৰ সন্মুখীন হ’ল চিৰাঙৰ এগৰাকী সাংবাদিক।

চিৰাঙত মটৰচাইকেল চলোৱাৰ সময়ত তেওঁলোকে কিয় হেলমেট পিন্ধা নাছিল বুলি প্ৰশ্ন কৰাৰ বাবে দুজন আৰক্ষীয়ে ৰাজ্যৰ এটা নিউজ চেনেলৰ সাংবাদিকক প্ৰহাৰ কৰাৰ ঘটনা সংঘটিত হৈছে।

সোমবাৰে চিৰাঙৰ বাসুগাঁও অঞ্চলত সংঘটিত হয় এই ঘটনা।

ঘটনাৰ বলি সাংবাদিকগৰাকী হৈছে ৰাজ্যৰ এটা ব্যক্তিগত নিউজ চেনেলৰ জয়ন্ত দেবনাথ।

ঘটনা সন্দৰ্ভত দেবনাথে কয় যে তেওঁ একমাত্ৰ দোষ আছিল তেওঁ আৰক্ষী দুজনক তেওঁলোকে মটৰ চাইকেল চলোৱাৰ সময়ত কিয় হেলমেট পিন্ধা নাছিল বুলি প্ৰশ্ন কৰিছিল।

লগতে পঢ়ক: পোহৰলৈ আহিল পিএম-কেয়াৰ্ছৰ ‘অডিট ৰিপ’ৰ্ট’; এবছৰত সংগ্ৰহ ১১হাজাৰ কোটি, ক’ত কৰিলে খৰচ?

তেওঁ লগতে কয়,’’ তেওঁলোক দুজন কনিষ্টবল আছিল আৰু প্ৰশ্ন কৰাৰ পাছত তেওঁলোকে দুয়োজনে মোক গালি দিয়াত মই তেওঁলোকক সাংবাদিক বুলি পৰিচয় দিয়াত তেওঁলোকে মোক শাৰীৰিকভাৱে প্ৰহাৰ কৰিবলৈ আৰম্ভ কৰে।‘’

‘’নিশা ঘটনাটো সংঘটিত হোৱালৈ চাই তেওঁলোকে মোক ভুৱা এনকাউন্টাৰ কৰি গুলীওৱাৰ সুযোগ ল’বও পাৰিলেহেঁতেন,’’- তেওঁ লগতে কয়।

তেওঁ দাবী কৰে যে আৰক্ষীক ‘চৰকাৰে ফ্ৰিহেণ্ড’ দিয়াৰ বাবেই এনে ঘটনা ঘটিবলৈ পালে। আৰক্ষীয়ে তেওঁলোকৰ ক্ষমতাৰ অপব্যৱহাৰ কৰা বুলিও তেওঁ কয়।

ঘটনাৰ বলি সাংবাদিকগৰাকীয়ে আৰক্ষীকে ধৰি সকলোৰে বাবে নিয়ম অনুসৰণ কৰাটো নিশ্চিত কৰিবলৈ অসম চৰকাৰক আহ্বান জনায়।

লগতে পঢ়ক:সৰুপথাৰত গ্ৰেপ্তাৰ সন্দেহযুক্ত চোৰাং চিকাৰী

আনহাতে, চিৰাঙৰ উপ আৰক্ষী অধীক্ষক লব ডেকাই প্ৰকাশ কৰিছে যে এই সন্দৰ্ভত বিহিত ব্যৱস্থা গ্ৰহণ কৰা হ’ব।

উল্লেখ্য যে এই ঘটনাৰ এক ভিডিঅ’ ছচিয়েল মিডিয়াতো ভাইৰেল হৈছে য’ত কেনেকৈ আৰক্ষী সাংবাদিকজনক প্ৰহাৰ কৰিছিল আৰু কেনেকৈ তেওঁক জোৰকৈ এখন আৰক্ষীৰ জীপত উঠাইছিল সেয়া স্পষ্টভাৱে দেখা গৈছে।