অগপৰ মধ্যস্থতাত নিৰ্বাচনী বুজাবুজিত এ আই য়ু ডি এফ-বিজেপি

এ আই য়ু দি এফৰ নাম লৈ বিজেপি নেতাসকলে অসমৰ জনসাধাৰণৰ সন্মুখত কংগ্ৰেছক আক্ৰমণ কৰি অহাৰ সময়তে চৰ্চালৈ আহিছে এক বিপৰীত ছবি।

ক্ষমতাৰ স্বাৰ্থতে অগপ মন্ত্ৰীকেইজনে মুখ্য মন্ত্ৰীৰ হৈ বদৰুদ্দিন আজমলৰ দলৰ সৈতে বুজাবুজিত “মধ্যস্থতাকাৰীৰ ৰূপত আত্মপ্ৰকাশ কৰিছে”, কংগ্ৰেছৰ বিবৃতিত প্ৰকাশ।

খোদ অগপ আৰু এ আই য়ু দি এফ নেতাৰ মন্তব্যৰ আঁত ধৰি এই দাবী কৰিছে কংগ্ৰেছে।

“অগপৰ তিনি মন্ত্ৰীক এ আই য়ু ডি এফৰ সৈতে মধ্যস্থতাকাৰীৰ দায়িত্ব মুখ্য মন্ত্ৰী সৰ্বানন্দ সোণোৱালে দিছে নেকি? মুখ্য মন্ত্ৰীজনৰ সেউজ সংকেত নাথাকিলে কোন মন্ত্ৰীৰ সাহস আছে যে এনেদৰে মুকলিমুৰীয়াকৈ এ আই য়ু ডি এফৰ সহায় বিচাৰি কথা পাতিব পাৰিব?।”, মুখ্য মন্ত্ৰী সোণোৱাল তথা বিজেপিলৈ পোনপটীয়া প্ৰশ্নৰে বিবৃতি অসম প্ৰদেশ কংগ্ৰেছৰ।

অগপৰ তিনি মন্ত্ৰী অতুল বৰা, কেশৱ মহন্ত আৰু ফণীভূষণ চৌধুৰীয়ে এ আই য়ু ডি এফৰ পৰা সহায় বিচাৰি ফোন কৰা বুলি বিধায়ক আমিনুল ইছলামে সংবাদ মাধ্যমত কৰা মন্তব্য খণ্ডন কৰা নাই মন্ত্ৰীকেইজনে। ওলোটাই মন্ত্ৰী ফণীভূষণ চৌধুৰীয়ে এ আই য়ু দি এফৰ সহায় বিচৰাটোত অস্বাভাৱিকতা নাই-ধৰণৰ মন্তব্যহে আগবঢ়াইছে।

“এ আই য়ু ডি এফৰ যিহেতু কলিয়াবৰত প্ৰাৰ্থী নাই, গতিকে অগপই তেওঁলোকৰ ভোট বিচাৰিব পাৰে।”, দেওবাৰে সাংবাদিকৰ আগত ফণীভূষণ চৌধুৰীৰ মন্তব্য।

লগতে পঢ়ক– বদৰুদ্দিনৰ লগত কংগ্ৰেছে মিত্ৰতা কৰি নিৰাপত্তাৰ প্রতি ভাবুকি কঢ়িয়াইছে: যোগী আদিত্য নাথ

লগতে পঢ়ক– বদৰুদ্দিনৰ দৰে সাম্প্ৰদায়িক শক্তিৰ ওচৰত অসম সুৰক্ষিত নহয়: বিশ্বনাথৰ সভাত মন্ত্ৰী হিমন্ত

সংখ্যালঘু ভোট-নিৰ্ভৰ দলটোৰ মুৰব্বী “বদৰুদ্দিন আজমল অসমৰ মুখ্য মন্ত্ৰী হ’ব”-ধৰণৰ প্ৰচাৰেৰে বিজেপি নেতাসকলে খিলঞ্জীয়াৰ সমৰ্থন বিচাৰি অহাৰ পৰিপ্ৰেক্ষিতত বিষয়টোৱে ব্যাপক চৰ্চা লাভ কৰিছে।