ছোমালিয়াত ১৫ ভাৰতীয়ৰ সৈতে হাইজেক জাহাজ; উদ্ধাৰ কৰিবলৈ প্ৰেৰণ নৌসেনাৰ যুদ্ধজাহাজ

আফ্ৰিকাৰ ছোমালিয়াৰ উপকূলত ১৫ জন ভাৰতীয় ক্ৰু সদস্য থকা এখন জাহাজ হাইজেক কৰা হৈছে। জাহাজখনত লাইবেৰিয়াৰ পতাকা উৰুৱা আছিল। ভাৰতীয় নৌসেনাই জনোৱা মতে, বৃহস্পতিবাৰে (৪ জানুৱাৰী) সন্ধিয়া ছোমালিয়াৰ উপকূলৰ পৰা মালবাহী জাহাজখন অপহৰণ কৰা হয়। জাহাজখনৰ নাম ‘এম ভি লিলা নৰ্ফক’।

নৌসেনাই জনায় যে তেওঁলোকে অপহৰণৰ ঘটনাৰ ওপৰত তীক্ষ্ণ দৃষ্টি ৰাখিছে। ইতিমধ্যে সেই স্থানলৈ প্ৰেৰণ কৰা হৈছে আই এন এছ চেন্নাই নামৰ এখন নৌসেনাৰ যুদ্ধ জাহাজ। বাতৰি মতে, অপহৰণ কৰা জাহাজখন নিৰীক্ষণৰ বাবে চোৰাংচোৱা বিমানো নিয়োগ কৰা হৈছে।

সূত্ৰ অনুসৰি ইতিমধ্যে জাহাজখনৰ ক্ৰু মেম্বাৰৰ সৈতে যোগাযোগ কৰা হৈছে। অৱশ্যে এই অপহৰণৰ আঁৰত কোন আছে সেই কথা নৌসেনাৰ তৰফৰ পৰা এতিয়াও প্ৰকাশ কৰা নাই ।

লগতে পঢ়কঃ মূৰৰ দাম ১ লাখ! আৰক্ষীৰ এনকাউণ্টাৰত নিহত কুখ্যাত গেংষ্টাৰ বিনোদ

নৌসেনাৰ মতে, আজি পুৱাৰ পৰাই তেওঁলোকৰ এখন পি ৮ আই মেৰিটাইম টহলদাৰী বিমানে হাইজেক কৰা জাহাজখনৰ চাৰিওফালে ঘূৰিবলৈ আৰম্ভ কৰিছে। বিমানখনৰ পৰাও জাহাজখনত থকাসকলৰ সৈতে যোগাযোগ কৰা হৈছে।

অপহৰণকাৰীসকলৰ সৈতে কথা পতাৰ অন্তত ভাৰতীয় ক্ৰু মেম্বাৰৰ সুৰক্ষা নিশ্চিত কৰা হয়। বিমানখনে জাহাজখনক অহৰহ নিৰীক্ষণ কৰি আছে। সহায়ৰ বাবে আই এন এছ চেন্নাইক সেই স্থানলৈ প্ৰেৰণ কৰা হৈছে। একে সময়তে অন্য দেশৰ নিৰাপত্তা সংস্থা আৰু অঞ্চলটোৰ বহুৰাষ্ট্ৰীয় নিৰাপত্তা সংস্থাৰ সৈতে সমন্বয়ৰে সামগ্ৰিক পৰিস্থিতিৰ ওপৰত নজৰ ৰখা হৈছে।

নৌসেনাই জনায় যে ভাৰতীয় নৌসেনাই আন্তঃৰাষ্ট্ৰীয় শক্তি আৰু বন্ধুত্বপূৰ্ণ বিদেশী শক্তিৰ লগতে অঞ্চলটোৰ বাণিজ্যিক জাহাজৰ সুৰক্ষা নিশ্চিত কৰাৰ বাবে প্ৰতিশ্ৰুতিবদ্ধ।

লগতে পঢ়কঃ চন্দ্ৰৰ পিছত সূৰ্য জয়! আদিত্য-এল১ মিছনৰ ডাঙৰ আপডেট; অধীৰ আগ্ৰহেৰে অপেক্ষা দেশবাসীৰ

লোহিত সাগৰ, এডেন উপসাগৰ আৰু মধ্য আৰু উত্তৰ আৰব সাগৰৰ কাষৰীয়া আন্তঃৰাষ্ট্ৰীয় বাণিজ্যিক চেনেলসমূহত শেহতীয়াকৈ আক্ৰমণ বৃদ্ধি পোৱা দেখা গৈছে। এই অঞ্চলত ইখনৰ পিছত সিখনকৈ বাণিজ্যিক জাহাজক আক্ৰমণ কৰা হৈছে। যোৱা মাহত আৰব সাগৰৰ সমীপত লাইবেৰিয়াৰ পতাকা থকা এম ভি কেম প্লুটো নামৰ এখন টেংকাৰক ড্ৰ’নে আক্ৰমণ কৰিছিল। সেই জাহাজখনতো ২১ জন ভাৰতীয় ক্ৰু মেম্বাৰ হিচাপে আছিল।

এম ভি কেম প্লুটোৰ উপৰিও ভাৰত অভিমুখী আন এখন বাণিজ্যিক তেল টেংকাৰো একেদিনাই দক্ষিণ লোহিত সাগৰত ড্ৰ’নে আক্ৰমণ কৰে। ফলত ভাৰতে সামুদ্ৰিক বাণিজ্যত নিৰাপত্তাৰ চিন্তা বৃদ্ধি কৰিছে।

লগতে পঢ়কঃ কম বয়সীয়া নাৰী পছন্দ আছিল বিল ক্লিণ্টনৰ! নাৰী নিৰ্যাতনকাৰী এপষ্টেইনৰ নথিত চাঞ্চল্যকৰ তথ্য

লেবাননৰ হুথী গোটে গাজাত ইজৰাইলৰ আক্ৰমণ বন্ধ নহ’লে এনেধৰণৰ আক্ৰমণ অব্যাহত ৰখাৰ হুংকাৰ দিছে। ইৰাণে মুকলিকৈ এই উগ্ৰপন্থী সংগঠনটোক সমৰ্থন কৰে। এই আক্ৰমণ প্ৰতিহত কৰিবলৈ পি ৮ আইয়ে আই এন এছ মৰ্মুগাও, আই এন এছ কোচি আৰু আই এন এছ কলকাতাৰ লগতে চোৰাংচোৱাগিৰিৰ বাবে টহলদাৰী বিমান মোতায়েন কৰে।