১৮ বছৰৰ ক্ৰিকেট কেৰিয়াৰৰ অৱসান ঘটাই উইকেটকীপাৰ বেটছমেন পাৰ্থিৱ পেটেলৰ অৱসৰ ঘোষণা

১৮ বছৰৰ কেৰিয়াৰৰ অৱসন ঘটাই উইকেটকীপাৰ বেটছমেন পাৰ্থিৱ পেটেলে আজি টুইটৰৰ জৰিয়তে সকলো ধৰণৰ ক্ৰিকেটৰ পৰা অৱসৰ গ্ৰহণ কৰাৰ কথা ঘোষণা কৰে।

মাত্ৰ ১৭ বছৰ বয়সতে ২০০২ চনত ইংলেণ্ডৰ বিৰুদ্ধে টেষ্ট ক্ৰিকেটত অভিষেক ঘটা পাৰ্থিৱ পেটেলে দেশৰ হৈ ২৫খন টেষ্ট, ৩৮খন এদিনীয়া আৰু দুখন টি-২০ মেচত অংশ লৈছিল।

টেষ্টত তেওঁ ৩১.১৩ গড়ে ৯৩৪ ৰান কৰে।

পাৰ্থিৱে অন্তিমবাৰৰ বাবে ২০১৮ চনত দক্ষিণ আফ্ৰিকাৰ বিৰুদ্ধে জোহান্সবাৰ্গত দেশৰ হৈ টেষ্ট মেচত অংশ লৈছিল।

তেওঁ টুইটাৰৰ জৰিয়তে নিজৰ কেৰিয়াৰ সামৰাৰ কথা উল্লেখ কৰি বিচিচিআই, গুজৰাট ক্ৰিকেট এছ’চিয়েশ্যনৰ লগতে তেওঁৰ শুভাকাংশীসকলক ধন্যবাদ জ্ঞাপন কৰে।

পাৰ্থিৱে ৰঞ্জি ট্ৰফিত গুজৰাটৰ হৈ ১৯৪খন মেচ খেলি ১১,০০০ ৰো অধিক ৰান সংগ্ৰহ কৰাৰ উপৰি এই বৰ্ণিল কেৰিয়াৰত ২৭টা শতক আৰু ৬৭টা অৰ্ধশতক অৰ্জন কৰিছিল।

তেওঁ কিছু ছিজনত গুজৰাটক নেতৃত্ব প্ৰদান কৰিছিল আৰু তেওঁৰ নেতৃত্বতে গুজৰাটে প্ৰথমবাৰৰ বাবে ২০১৬-১৭ ছিজনত চেম্পিয়ন হৈছিল।

আই পি এলতো পেটেলে কেইবাটাও দলৰ হৈ খেলি নিজৰ প্ৰভাৱ বিস্তাৰ কৰিছিল। তেওঁ আই পি এলত মুম্বাই ইণ্ডিয়ানছ, চেন্নাই ছুপাৰ কিংছ, ছানৰাইজাৰ্ছ হায়দৰাবাদ, ৰয়েল চেলেঞ্জাৰ্ছ বেংগালুৰু আদি দলৰ হৈ খেলিছিল।

তেওঁ ৰাজ্যৰ লগতে আই পি এলত সৰ্বমুঠ ২০৪খন টি-২০ মেচ খেলি ২৩টা অৰ্ধশতকৰ সহায়ত ৪,৩০০ ৰান সংগ্ৰহ কৰিছিল।