বিদ্যালয়ৰ পৰা ঘৰলৈ আহি থকা দশম শ্ৰেণীৰ ছাত্ৰীক ৰাস্তাতে নৃশংস হত্যা
আজি দৰং জিলাৰ দলগাঁৱত সংঘটিত হৈছে এক ভয়ংকৰ তথা জঘন্য হত্যাকাণ্ড।
দিন দুপৰতে ৰাস্তাৰ ওপৰত এগৰাকী কিশোৰীক নিৰ্মমভাৱে হত্যা কৰি পেলাই থৈ যোৱা ঘটনাই এতিয়া অঞ্চলটোত তীব্ৰ চাঞ্চল্যৰ সৃষ্টি কৰিছে।
ঘটনাটোত মৃত্যুমুখত পৰা কিশোৰী গৰাকী দলগাঁও উচ্চতৰ মাধ্যমিক বিদ্যালয়ৰ দশম শ্ৰেণীত অধ্যয়ণৰত মণিমালা ভৌমিক (১৫) বুলি জানিব পৰা গৈছে।
ঘটনা সন্দৰ্ভত জানিব পৰা মতে কিশোৰী গৰাকীয়ে বিদ্যালয়ৰ পৰা ঘৰলৈ বুলি আহি থাকোতে অচিনাক্ত দুৰ্বৃত্তই বাট আগচি ধৰি চোকা অস্ত্ৰৰে আক্ৰমণ কৰি ৰাস্তাৰ কাষত পেলাই থৈ যায়।
এই ঘটনা সংঘটিত হোৱাৰ কিছু সময় পাছত ছাত্ৰী গৰাকীক সংকটজনক অৱস্থাত মঙলদৈ অসামৰিক চিকিৎসালয়লৈ লৈ যোৱা হয় যদিও চিকিৎসকে মৃত ঘোষণা কৰে।
হত্যাকাণ্ডৰ আঁৰৰ ৰহস্য এতিয়াও জানিব পৰা হোৱা নাই যদিও একাংশ বন্ধু-বান্ধৱীয়ে এয়া প্ৰেমজনিত কাৰণত সংঘটিত হ’ব পাৰে বুলি মন্তব্য কৰে।
ইফালে শিহৰণকাৰী হত্যাকাণ্ডটোৰ তদন্ত আৰক্ষীয়ে আৰম্ভ কৰিছে কিন্তু এই পৰ্যন্ত কোনো লোককে আটক কৰা হোৱা নাই বুলি জানিবলৈ দিয়ে।