কাজিৰঙাৰ ৰাষ্ট্ৰীয় উদ্যানৰ বৰজুৰিত থকা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ প্ৰতিষ্ঠা দিৱস উদযাপন

বোকাখাতৰ পানবাৰী সংৰক্ষিত বনাঞ্চলৰ সমীপৰ বৰজুৰিত ২০০২ চনৰ ২৮ আগষ্টত স্থাপন হোৱা দেশৰ ভিতৰতে অন্যতম বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰই আজি কেন্দ্ৰটোৰ ২০ সংখ্যক প্ৰতিষ্ঠা দিৱস পালন কৰে৷ আজিৰ পৰা ২০ বছৰৰ আগৰ আজিৰ দিনটোতে উত্তৰ পূৱ ভাৰতৰ বন্যপ্ৰাণী উদ্ধাৰ আৰু পুনৰ সংস্থাপনৰ লক্ষ্যৰেই এই কেন্দ্ৰটো স্থাপন কৰা হৈছিল ৷

বোকাখাতৰ বৰজুৰিত থকা বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰত ২০ সংখ্যক প্ৰতিষ্ঠা দিৱস উপলক্ষে এক বিশেষ অনুষ্ঠানৰ আয়োজন কৰা হয় ৷ এই অনুষ্ঠানত পূৱ অসম বন্যপ্ৰাণী সংমণ্ডলৰ ডি এফ অ’ ৰমেশ কুমাৰ গগৈ, ৱাইল্ড লাইফ ট্ৰাষ্ট অৱ ইণ্ডিয়া উপ সঞ্চালক ড৹ ৰথীন বৰ্মন, কাজিৰঙাৰ গৱেষণা বিষয়া ৰবীন্দ্ৰ শৰ্মা, অৱসৰ প্ৰাপ্ত উপ বন সংৰক্ষক খৰ্গ সিং ডেকাৰজা আৰু কাজিৰঙাৰ উচ্চ পদস্থ বন বিষয়াৰ লগতে কেন্দ্ৰৰ সকলো বিষয়া-কৰ্মচাৰী উপস্থিত থাকে ৷ অনুষ্ঠানত ডি এফ অ’ ৰমেশ কুমাৰ গগৈয়ে কেক কাটি প্ৰতিষ্ঠা দিৱসৰ শুভাৰম্ভ কৰে ৷

উল্লেখ্য যে ২০০২ প্ৰতিষ্ঠা হোৱা বন্যপ্ৰাণী পুনৰ সংস্থাপন আৰু সংৰক্ষণ নামৰ এই কেন্দ্ৰটো অসম চৰকাৰৰ বন বিভাগ, দেশৰ আগশাৰীৰ সংগঠন ৱাইল্ড লাইফ ট্ৰাষ্ট অৱ ইণ্ডিয়া আৰু আন্ত:ৰাষ্ট্ৰীয় সংগঠন ইন্টাৰনেচনেল ফাণ্ড ফৰ এনিমেল ৱেলফেয়াৰৰ দ্বাৰা পৰিচালিত ৷ কাজিৰঙা ৰাষ্ট্ৰীয় উদ্যানৰ সঞ্চালক জন এই কেন্দ্ৰৰো সঞ্চালক ৷ সম্প্ৰতি জেষ্ঠ পশু চিকিৎসক ডা৹ চামচুল আলী কেন্দ্ৰ পৰিচালক হিচাবে, ডাঃ কিশোৰ বৰুৱা সহকাৰী পশুচিকিৎসক হিচাবে আৰু ১০ জন পশু পালক এই কেন্দ্ৰত কৰ্মৰত ৷

প্ৰতিষ্ঠা কালৰে পৰা কেন্দ্ৰটোয়ে ৭৩৯৭ টা বন্যপ্ৰাণীক দুৰ্গত পৰিস্থিতিৰ পৰা উদ্ধাৰ কৰি কেন্দ্ৰত চিকিৎসা প্ৰদান কৰিছে আৰু ইয়াৰে  ৪৪৯০ টা বন্যপ্ৰাণীক চিকিৎসাৰ পিচত পুনৰ বনাঞ্চলত মুকলি কৰি দিবলৈ সক্ষম হৈছে ৷ বন্যপ্ৰাণী পুনৰ সংস্থাপনৰ ক্ষেত্ৰত এইয়া বিশ্বৰ ভিতৰতে সৰ্বাধিক হিচাবে স্বীকৃত হৈছে ৷

২০০৬ চনত ৰাইন’ ভিচন ২০২০ আঁচনিৰ অধীনত কেন্দ্ৰটোৰ পৰা প্ৰথমটো গঁড় পোৱালী মানাহ ৰাষ্ট্ৰীয় উদ্যানলৈ পুনৰ সংস্থাপনৰ বাবে প্ৰেৰণ কৰা হয় ৷ ইয়াৰ পিচতে পৰ্যায় ক্ৰমে মুঠ ২১ টা গঁড় কেন্দ্ৰৰ পৰা মানাহলৈ পুনৰ সংস্থাপনৰ বাবে প্ৰেৰণ কৰা হয় ৷ মানাহত পুনৰ সংস্থাপন কৰা এই গঁড়ে ইতিমধ্যেই মানাহ ৰাষ্ট্ৰীয় উদ্যানত ১১ টা পোৱালী জন্ম দিয়া বুলি বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰই জানিবলৈ দিছে৷

একে দৰে বিভিন্ন স্থানৰ পৰা উদ্ধাৰ কৰি আনি কেন্দ্ৰটোত চিকিৎসা প্ৰদান কৰি সুস্থ কৰি তোলা ২৯ টা হাতী পোৱালীকো বিগত সময় চোৱাত কেন্দ্ৰটোৰ পৰা মানাহ ৰাষ্ট্ৰীয় উদ্যানলৈ প্ৰেৰণ কৰা হৈছে ৷ এই ২৯ টা হাতী পোৱালীৰ ১১ টা হাতীক ইতিমধ্যেই মানাহৰ বনাঞ্চলত সফলতাৰে মুকলি কৰি দিয়া হৈছে ৷

বৰজুৰিৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰই আজি ২০ সংখ্যক প্ৰতিষ্ঠা দিৱস উদযাপন কৰা সময়ত কেন্দ্ৰটোত পাঁচটা নাহৰফুটুকী বাঘ, এটা ম’হ, ১ টা হাতী পোৱালী, দুটা গঁড়ৰ পোৱালী, এটা সোনালী বান্দৰ, এটা ধনেশ চৰাই আৰু এটা লাজুকী বান্দৰ চিকিৎসাধীন অৱস্থাত পশুচিকিৎসকৰ নিৰীক্ষণত আছে।