কোকৰাঝাৰৰ তিনিটা অঞ্চলত কণ্টেইনমেণ্ট জ’ন ঘোষণা
সমগ্ৰ ৰাজ্যৰ লগতে কোকৰাঝাৰ জিলাতো ক’ৰ’ণাত আক্ৰান্ত ৰোগীৰ সংখ্যা দিনক দিনে বৃদ্ধি পাইছে। এনে পৰিস্থিতিত কোকৰাঝাৰৰ জিলা প্ৰশাসনৰ লগতে স্বাস্থ্য বিভাগে ক’ৰ’ণাৰ সংক্ৰমণ ৰোধ কৰিবলৈ বিভিন্ন ব্যৱস্থা গ্ৰহণ কৰিছে।
কোকৰাঝাৰ চহৰৰ মাজ মজিয়াত অৱস্থিত কেইবাটাও অঞ্চলত শেহতীয়াকৈ ক’ৰ’ণাত আক্ৰান্ত ৰোগীৰ সংখ্যা বৃদ্ধি পাইছে।
চহৰ খনৰ কেন্দ্ৰস্থলত অৱস্থিত শান্তি নগৰ, গৌৰাং নগৰ আৰু ৰবীন্দ্ৰ নগৰত ক’ৰ’ণা ৰোগী চিনাক্ত হোৱাৰ পিছতে উক্ত অঞ্চল কেইটা প্ৰশাসনে কণ্টেইনমেণ্ট জ’ন হিচাবে ঘোষণা কৰিছে।
ফলত অঞ্চল কেইটালৈ বাহিৰৰ পৰা কোনো লোকৰ প্ৰৱেশ বন্ধ হৈ পৰিছে।
কোকৰাঝাৰ জিলাত এতিয়া লৈকে ৪০৮ গৰাকী লোক ক’ৰ’ণা ভাইৰাছত আক্ৰান্ত হৈছে।
অৱশ্যে তেওঁলোকৰ মাজৰে ৩৩৮ গৰাকী লোক ইতিমধ্যে ৰোগমুক্ত হ’বলৈ সক্ষম হৈছে বুলি স্বাস্থ্য বিভাগৰ সূত্ৰই প্ৰকাশ কৰিছে।