কাজিৰঙাৰ কহঁৰা বনাঞ্চলত ঢেকীয়াপতীয়া বাঘৰ মৃতদেহ উদ্ধাৰ

কাজিৰঙা ৰাষ্ট্ৰীয় উদ্যানৰ কহঁৰা বনাঞ্চলৰ টাজেং বনশিৱিৰ এলেকাৰ এখন কাঠনিত আজি পুৱা এজনী মাইকী ঢেকীয়াপতীয়া বাঘৰ পোৱালীৰ মৃতদেহ উদ্ধাৰ হয় ৷

পুৱা বনাঞ্চলত নিয়মিত পহৰাত যোৱা বনকৰ্মীয়ে বাঘ পোৱালীটোৰ মৃতদেহ উদ্ধাৰ কৰি বনাঞ্চলিক বিষয়াক অৱগত কৰে ৷

পৰৱৰ্তী সময়ত কাজিৰঙাৰ সঞ্চালক পি শিৱকুমাৰৰ তৎপৰতাত ৰাষ্ট্ৰীয় উদ্যানৰ উপ বন সংৰক্ষক প্ৰদীপ বাৰ্মা, খৰ্গৰাম ডেকাৰজা, বনাঞ্চলিক বিষয়া চেলিম আহমেদ আৰু গৱেষণা বিষয়া ৰবীন্দ্ৰ শৰ্মাৰ নেতৃত্বত বিভাগীয় পশু চিকিৎসক ডা০ বিশ্বজিত বৰুৱা, ডা০ অৰিন্দ্ৰম পাচনি আৰু বনাঞ্চলিক বিষয়া তথা পশু চিকিৎসক ডা৹ ইন্দ্ৰানী বৰগোহাঁই সহ এটা দল ঘটনাস্থলীলৈ গৈ মৃত ঢেকীয়াপতীয়া বাঘ পোৱালীটোৰ মৰোনোত্তৰ পৰীক্ষা কৰে।

মৰোণোত্তৰ পৰীক্ষাৰ সময়ত বাঘজনীৰ শৰীৰৰ বিভিন্ন স্থানত গভীৰ ক্ষত চিহ্নৰ লগতে বুকুত ৫ ডাল কামি হাড় ভঙাৰ উপৰিও হাওঁফাওঁটো গভীৰ ভাৱে জখম হোৱাৰ চিন পোৱা বুলি পশুচিকিৎসকে জনায়।

বাঘজনী এদিনৰ পুৰ্বে অন্য বাঘৰ আক্ৰমনতেই মৃত্যু হোৱা বুলি পশু চিকিৎসকে নিশ্চিত কৰে।

মৰোণোত্তৰ পৰীক্ষাৰ শেষত ৰাষ্ট্ৰীয় বাঘ সংৰক্ষণ প্ৰাধিকৰণৰ নিৰ্দেশ মতে বনাঞ্চলৰ ভিতৰৰ ঘটনাস্থলীতেই সকলোৰে উপস্থিতিত মৃত বাঘজনীৰ সৎকাৰ কৰা হয়।