বলীউদৰ এগৰাকী জনপ্ৰিয় তথা বলিষ্ঠ অভিনেতা অচ্যুত পটদাৰৰ পৰলোকপ্ৰাপ্তি

থ্ৰী ইডিয়টছ ছবিৰ জনপ্ৰিয় সংলাপ ‘আৰে কেহনা ক্যা চাহতে হো’ৰ অভিনেতা অচ্যুত পটদাৰৰ পৰলোক ঘটিছে। সোমবাৰে ৯১ বছৰ বয়সত তেওঁ শেষ নিশ্বাস ত্যাগ কৰে। কিছুমান শাৰীৰিক জটিলতাৰ বাবে তেওঁক থানেৰ জুপিটাৰ হাস্পতালত ভৰ্তি কৰোৱা হৈছিল। তাতেই তেওঁৰ মৃত্যু হয়।

অৱশ্যে মৃত্যুৰ প্ৰকৃত কাৰণ এতিয়াও প্ৰকাশ কৰা হোৱা নাই। আজি অৰ্থাৎ মঙলবাৰে থানেত তেওঁৰ শেষকৃত্য সম্পন্ন কৰা হ’ব। তেওঁৰ মৃত্যুৰ খবৰটো প্ৰথমে ইনষ্টাগ্ৰামত এটা ব্যক্তিগত চেনেলৰ শ্ৰদ্ধাঞ্জলি পোষ্টৰ জৰিয়তে পোহৰলৈ আহে।

চাৰি দশকৰো অধিক দীঘলীয়া কেৰিয়াৰত অচ্যুত পটদাৰে ১২৫খনতকৈও অধিক হিন্দী আৰু মাৰাঠী ছবিত কাম কৰিছে। বাণিজ্যিক আৰু সমালোচকৰ প্ৰশংসিত দুয়ো ধৰণৰ ছবিতে তেওঁ সমান দক্ষতাৰে অভিনয় কৰিছে। তেওঁ অভিনয় কৰা ছবিৰ ভিতৰত আক্ৰোশ, এলবাৰ্ট পিণ্টো কো গুছা কিউন আটা হায়, অৰ্ধসত্য, তেজাব, পৰিন্দা, ৰাজু বান গয়া জেন্টলমেন, দিলৱালে, ৰংগীলা, প্ৰভু, হম সাথ সাথ হায়, পৰিনীতা, লাগে ৰাহো মুন্না ভাই, দাবাং ২ আৰু ভেন্টিলেটৰ আদিৰ দৰে বিখ্যাত ছবি আছে।

২০০৯ চনত মুক্তি পোৱা থ্ৰী ইডিয়টছত এগৰাকী কঠোৰ অধ্যাপক হিচাপে তেওঁৰ অভিনয় এতিয়াও দৰ্শকৰ মনত খোদিত হৈ আছে। বিশেষকৈ তেওঁৰ সংলাপ “আৰে, কেহানা কিয়া চাহতে হো” অত্যন্ত জনপ্ৰিয় হৈ পৰিছিল। যিটো এতিয়াও ছ’চিয়েল মিডিয়াত মিম হিচাপে প্ৰচাৰিত হৈ আছে।

কেৱল ছবিতে নহয়, টেলিভিছনতো তেওঁৰ শক্তিশালী উপস্থিতি আছিল। ভাৰত এক খোজ, অল দ্য বেষ্ট (দূৰদৰ্শন), প্ৰধান মন্ত্ৰী (জী টিভি), আগলে জনম মোহে বেটিয়া হি কিজো (জী টিভি), আহত (১৯৯৫-২০০১, চনী টিভি), ৱাগলে কি দুনিয়াৰ পৰা আৰম্ভ কৰি মাঝা হোশীল না (জী মাৰাঠী) – এই সকলোবোৰতে তেওঁৰ সহজ, উজ্জ্বল অভিনয়েসকলোকে আকৃষ্ট কৰিছিল।

অভিনয়ৰ ক্ষেত্ৰলৈ অহাৰ পূৰ্বে পটদাৰ সম্পূৰ্ণ বেলেগ পেছাত জড়িত আছিল। প্ৰাথমিক জীৱনত মধ্যপ্ৰদেশৰ ৰেৱাত শিক্ষকতা কৰিছিল। পিছলৈ ভাৰতীয় সেনাবাহিনীত যোগদান কৰি ১৯৬৭ চনত অধিনায়ক হিচাপে অৱসৰ গ্ৰহণ কৰে। তাৰ পিছত প্ৰায় ২৫ বছৰ ইণ্ডিয়ান অইলত উচ্চ পদবীত কাম কৰি ১৯৯২ চনত অৱসৰ গ্ৰহণ কৰে।

৪৪ বছৰ বয়সত তেওঁ ছবি জগতত প্ৰৱেশ কৰে আৰু তাৰ পৰাই তেওঁৰ অভিনয় জীৱন আৰম্ভ হয়। অচ্যুত পটদাৰৰ মৃত্যুত চিনেমা আৰু টেলিভিছন জগত শোকস্তব্ধ হৈ পৰিছে।