কৃষি আইনৰ বিৰুদ্ধে প্ৰবল প্ৰতিবাদ চলি থকাৰ সময়তে মহাৰাষ্ট্ৰৰ আকোলা জিলাৰ এজন কৃষকে উপাৰ্জনৰ বিকল্প উপায় হিচাপে গঢ়ি তুলিছে এটা ছাগলীৰ বেংক। ইয়াৰ নাম দিয়া হৈছে ‘Goat Bank of Karkheda’।
বেংকটোৰ সুতৰ আজৱ নিয়মৰ ব্যৱস্থাটোৱে সকলোকে আচৰিত কৰিছে। য’ত ছাগলীৰ বাবে সুত দিব লাগিব ভেড়া!
আকোলা জিলাৰ ছাংগাভি মোহাডি গাঁওত গঢ়ি তোলা হৈছে এই ‘Goat Bank of Karkheda’টো। এনে ব্যৱস্থাৰে ৰাজ্যখনত প্ৰশংসা বুটলিবলৈ সক্ষম হোৱা কৃষকজনৰ নাম হৈছে নৰেশ দেশমুখ।
পঞ্জাৱৰ কৃষি বিদ্যাপীঠৰ পৰা স্নাতক ডিগ্ৰীধাৰী ৫২ বছৰীয়া দেশমুখে ২০১৮চনত এই বেংকটো স্থাপন কৰে।
বাতৰি অনুসৰি, কোনো কৃষকে এই বেংকৰ পৰা ঋণ ল’লে প্ৰথমতে তেওঁ ১,২০০টকাৰে পঞ্জীয়ন কৰিব লাগিব। বেংকটোৰ নিয়ম অনুসৰি প্ৰত্যেকে এটাকৈ ছাগলী পাব। ইয়াৰ পৰিৱৰ্তে তেওঁক দিব লাগিব ৪টাকৈ ভেড়া।
বেংকে বান্ধি দিয়া ম্যাদ অনুসৰি ঋণ লওঁতা কৃষকে ৪০ মাহৰ ভিতৰত এই ভেড়া কেইটা বেংকক জমা দিব লাগিব।
দেশমুখে জানিবলৈ দিয়া মতে তেওঁ গাঁওখনলৈ প্ৰথমতে আহোতে ইয়াৰ আৰ্থিক অৱস্থা খুবেই বেয়া আছিল। কৃষক পৰিয়ালৰ মহিলাসকলে সৰু মাটি এটুকুৰাতে ছাগলী প্ৰতিপালন কৰি ল’ৰা-ছোৱালীৰ পঢ়াশুনাৰ খৰচো যোগাৰ কৰি আহিছিল। এনে পৰিয়ালবোৰক সহায় কৰাৰ বাবেই তেওঁ এই গোট বেংক স্থাপন কৰাৰ কথা ভাৱিছিল।
নিজৰ সঞ্চিত ৪০ লাখ টকা খৰচ কৰি তেওঁ এই বেংক গঢ়ি তোলে। তেওঁ ৩৪০টা পূৰ্ণবয়স্ক ছাগলী ক্ৰয় কৰে। ইয়াৰ পাছত তেওঁ এই ছাগলীবোৰ গাঁওবাসীক প্ৰদান কৰে। এই ব্যৱসায়টোৰ পৰা তেওঁ এতিয়া ২.৫লাখ টকা লাভ কৰিছে।
গাওঁৰ লোকসকলে তেওঁৰ আঁচনিৰ অধীনত ছাগলী ঋণ লৈ ইয়াৰ পৰিৱৰ্তে ৪০ মাহৰ ভিতৰত তেওঁক ৪টা ভেড়া আদায় দিব লাগে।
