বলীউদত ‘হাংগামা’: সুভাষ ঘাইৰ বিৰুদ্ধে মুখ খুলি কি ক’লে অভিনেত্ৰী মহিমাই?

বলীউদত নেপ’টিজম বা স্বজন-তোষণক লৈ বৰ্তমান চলি থকা ব্যাপক চৰ্চাৰ মাজতে এইবাৰ অভিনেত্ৰী মহিমা চৌধুৰীয়ে মুখ খুলিলে প্ৰসিদ্ধ পৰিচালক সুভাষ ঘাইৰ বিৰুদ্ধে।

অভিনেত্ৰী গৰাকীয়ে দাবী কৰে যে তেওঁক কাম নিদিয়াৰ বাবে কেইবাগৰাকী প্ৰযোজকক ‘পৰদেশ’ ছবিখনৰ পৰিচালকগৰাকীয়ে মেছেজ দিছিল।

শেহতীয়াকৈ সংবাদ মাধ্যমত দিয়া এক সাক্ষাৎকাৰত মহিমাই কয় যে সুভাই ঘাইয়ে তেওঁক অপমান কৰিছিল। তেওঁ মহিমাক আদালতৰ মজিয়ালৈ টানি নিছিল আৰু তেওঁৰ প্ৰথম শ্ব’ বাতিল হোৱাটো বিচাৰিছিল।

মহিমাই ইয়াক তেওঁৰ বাবে এক মানসিক চাপ সৃষ্টি কৰা বিষয় আছিল বুলি অবিহিত কৰে।

তেওঁ লগতে কয় যে প্ৰযোজকসকলক মেচেজ পঠিয়াই সুভাষ ঘাইয়ে কৈছিল যে কোনোৱে যাতে মহিমাৰ সৈতে কাম নকৰে।

তেওঁ উনুকিয়াই দিয়ে যে ১৯৯৮ বা ১৯৯৯ চনৰ ট্ৰেড গাইড মেগাজিনত সুভাষ ঘাইয়ে এটা বিজ্ঞাপন দিছিল। তাত তেওঁ কৈছিল যে যদি কোনোৱে মহিমা চৈধুৰীৰ সৈতে কাম কৰিব বিচাৰে তেতিয়াহ’লে তেওঁলোকে তেওঁৰ সৈতে যোগাযোগ কৰিব লাগিব, নহ’লে চুক্তিভংগ হ’ব।

মহিমাৰ মতে সুভাষ ঘাইৰ অনুমতি ল’ব লাগিব বুলি কোৱাৰ দৰে প্ৰকৃততে তেনে কোনো চুক্তি নাছিল।

মহিমাই প্ৰকাশ কৰে যে সেই সময়ত তেওঁৰ কাষত বলীউদৰ মাত্ৰ কেইজনমানেহে থিয় দিছিল। তেওঁলোকৰ ভিতৰত আছিল চলমান খান, সঞ্জয় দত্ত, ডেভিড ধাৱান আৰু ৰাজকুমাৰ সন্তোষী। তেওঁলোকে ফোন কৰি মহিমাক সাহস দিছিল।

আনহাতে, সুভাষ ঘাইয়ে এই অভিযোগ অস্বীকাৰ কৰিছে। তেওঁৰ মতে মহিমাৰ সৈতে সৰু বিবাদ এটা হৈছিল। সেয়া আছিল এক চুক্তি উলংঘাৰ ঘটনা যাৰ বাবে মহিমাই ক্ষমা বিচাৰিছিল।