বিশ্বৰ আটাইতকৈ দুখী হাতী মালিৰ মৃত্যু ঘটিছে। ৪৩ বছৰ বয়সত ফিলিপাইনছৰ মেনিলাৰ চিৰিয়াখানাত শেষ নিশ্বাস ত্যাগ কৰিলে হাতীটোৱে। মেনিলা কৰ্তৃপক্ষই এক সংবাদমেল যোগে নিশ্চিত কৰিছে হাতীটোৰ মৃত্যুৰ খবৰ।
প্ৰকাশিত খবৰ অনুসৰি, মঙলবাৰে বিয়লি ৩.৪৫ বজাত হাতীটোৰ মৃত্যু হয়। মালিৰ মৃত্যুৰ কথা সদৰী কৰি মেনিলাৰ মেয়ৰ হানি লাকুনাই হাতীটোৰ মৃত্যুত শোক প্ৰকাশ কৰি মালিক এক বহুমূলীয়া সম্পত্তি আখ্যা দিয়ে।
উল্লেখ্য যে, মেনিলাৰ এখন চিৰিয়াখানাত অকলে বাস কৰিছিল মালিয়ে। এনে অকলশৰীয়া জীৱনৰ বাবে হাতীটোক স্থানান্তৰিত কৰাৰ বাবে সমগ্ৰ বিশ্বতে কেইবাবাৰো আবেদন-নিবেদন কৰা হৈছিল যদিও মূৰকত এই সকলো ব্যৰ্থ হৈছিল।
জনপ্ৰিয় বেণ্ড দ্য বিটলছৰ সদস্য পল মেককাৰ্থনীয়েও ২০১২ চনত ফিলিপাইনছৰ ৰাষ্ট্ৰপতিলৈ এক পত্ৰ লিখি হাতীটোক মুকলি কৰি আন এখন দেশলৈ স্থানান্তৰিত কৰাৰ বাবে আহ্বান জনাইছিল।
শেহতীয়া কিছুদিনৰ অসুস্থতাৰ অন্তত মৃত্যু হোৱা মালিৰ মৰণোত্তৰ পৰীক্ষাত পেনক্ৰিয়াটিক কেন্সাৰ হোৱা বুলি ধৰা পৰে। বিবিচিৰ তথ্য অনুসৰি ১৯৮১ চনত শ্ৰীলংকা চৰকাৰে ফিলিপাইনছৰ প্ৰাক্তন ‘ফাৰ্ষ্ট লেডী’ ইমেল্ডা মাৰ্কছক মালিক উপহাৰ দিছিল।
Rest in Peace, Mali the Elephant 💔
The world is mourning the death of Mali who spent decades alone at the Manila Zoo 😔🌹 https://t.co/BJWmCAakJA pic.twitter.com/DCb5UaA9pE
— PETA (@peta) November 29, 2023
সেই সময়ত হাতীটোৰ বয়স আছিল ১১ মাহ।১৯৭৭ চনৰ পৰা চিৰিয়াখানাত বাস কৰা শিৱ নামৰ আন এটা হাতীৰ লগত প্ৰথমে দিন কটাইছিল মালিয়ে।
কিন্তু ১৯৯০ চনত শিৱৰ মৃত্যু হয় আৰু তেতিয়াৰ পৰা মালিয়ে অকলশৰীয়াকৈ বাস কৰি আহিছে। পিপল ফৰ দ্য এথিকেল ট্ৰিটমেণ্ট অৱ এনিমেলছ (পেটা) ই মালিক বিশ্বৰ আটাইতকৈ দুখী বুলি অভিহিত কৰিছিল।
