কামাখ্যাত সেৱা ল’লে তৃণমূল কংগ্ৰেছৰ মুৰব্বী মমতা বেনাৰ্জীয়ে

পশ্চিম বংগৰ মুখ্যমন্ত্ৰী তথা তৃণমূল কংগ্ৰেছৰ মুৰব্বী মমতা বেনাৰ্জীয়ে আজি গুৱাহাটী ভ্ৰমণ কৰি কামাখ্যা মন্দিৰত সেৱা আগবঢ়ায়।

কলকাতা পৌৰ নিগমৰ নিৰ্বাচনত তৃণমূলৰ বৃহৎ বিজয়ৰ পিছত মমতা বেনাৰ্জীয়ে দেৱী কামাখ্যাৰ পৰা আশীৰ্বাদ গ্ৰহণ কৰে।

দুপৰীয়া প্ৰায় ১:৩০ বজাত গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰত অৱতৰণ কৰি পোনে পোনে কামাখ্যা মন্দিৰলৈ যাত্ৰা কৰে বেনাৰ্জীয়ে।

অৱশ্যে এই ভ্ৰমণক সম্পূৰ্ণ ব্যক্তিগত ভ্ৰমণ বুলি উল্লেখ কৰে মমতা বেনাৰ্জীয়ে। ভ্ৰমণ সম্পূৰ্ণ হোৱাৰ পিছত পশ্চিম বংগৰ মুখ্যমন্ত্ৰী গৰাকী পুনৰ কলকাতালৈ উভতি যাব।

ত্ৰিপুৰা, মেঘালয় আৰু অসমৰ ৰাজনীতিত তৃণমূলৰ প্ৰৱেশৰ পিছত মমতা বেনাৰ্জীৰ যিকোনো উত্তৰ-পূব ৰাজ্যলৈ এয়া প্ৰথম ভ্ৰমণ।